Xuutiyiinta oo diyaarado aan duuliya lahayn ku weeraray Israa’iil
-
GAROWE ONLINE XAFIISKA MUQDISHO
- Posted On 31-10-2023, 11:15AM
SANCA (GO) - Xuutiyiinta Yemen ayaa sheegtay mas'uuliyadda duullaanka maanta lagu qaaday Israa'iil ka dib markii ay ciidammada Israa'iil ku dhawaaqeen in diyaarad cadow ah weerartay magaalada Eilat.
Madaxa Xukuumadda Xuutiyiinta, Cabdulcasiis bin Habtour, ayaa wareysi uu siiyay wakaaladda wararka ee France-Presse ku yiri: “diyaaradahan waxaa iska leh Jamhuuriyadda Yaman, oo Sanca caasimad u ah,”.
Afhayeenka ciidamada Israel Avichay Adraee ayaa dhankiisa yiri: "Iyadoo la raacayo warbixinada hordhaca ah, nidaamyada Difaaca ee ciidanka ayaa ogaaday halis ku soo wajahan dhulka Dawladda Israa'iil isla markii ayayna ka hortageen, wax halis ahna uma keenin Shacabka Israa’iil”.
Wakaaladda wararka ee Reuters ayaa sidoo kale ka soo xigatay “Radio Israa’iil” in Diyaarad nooca aan duuliyaha lahayn lagu soo riday badda cas, meel u dhow magaalada Eilat, halka wararka Channel 13 ay sheegayaan in diyaaradda ay sida muuqata Xuuthiyiinta Yemen soo kiciyeen.
GAROWE ONLINE
