Yemen: Xuutiyiinta oo Isku Dayaya inay La Wareegaan Marinka Bab al-Mandab

Sanca, Yemen — In ka badan 120 qof ayaa lagu dilay dagaallo culus oo ka dhacay Yemen, kaddib markii Xuutiyiinta ay weerar ballaaran ku qaadeen deegaanno muhiim ah oo ku dhow marinka Bab al-Mandab ee isku xira Badda Cas iyo Gacanka Cadmeed, sida ay ilo xog-ogaal ah sheegeen.

Dagaalka ayaa billowday Khamiistii, kaddib markii Xuutiyiinta oo Iran ay taageerto ay weerar dhulka ah ku qaadeen fariisimo ay dowladda Yemen gacanta ku hayso, iyagoo sidoo kale adeegsaday gantaallo iyo diyaarado aan duuliye lahayn.

Ujeeddada weerarka ayaa la sheegay inay tahay in Xuutiyiintu ay xoojiyaan gacan-ku-hayntooda marin-biyoodka Bab al-Mandab, oo ah mid ka mid ah marinnada ugu muhiimsan ee maraakiibta ganacsiga iyo shidaalka dunida.

Yemen ayaa in ka badan toban sano ku jirtay dagaal sokeeye, iyadoo xaaladda dalka ay mar kale sii xumaatay bishii Luulyo, markii Xuutiyiintu ay jabiyeen xabbad-joojin socotay tan iyo 2022, taas oo u dhexeysay kooxda iyo dowladda Yemen ee ay taageerto Sacuudiga.

Tan iyo markaas, Xuutiyiintu waxay xannibaad badeed ku soo rogeen maraakiibta xiriirka la leh Sacuudiga, iyagoo sidoo kale dhowr jeer weeraray maraakiib ku socda Badda Cas.

Badda Cas ayaa ah marin muhiim u ah ganacsiga caalamiga ah, waxaana muhiimaddeedu sii korortay kaddib markii dagaallada gobolka ay saameeyeen isu-socodka maraakiibta ee marin-biyoodka Hormuz.

Xuutiyiinta ayaa sidoo kale muddo dheer weerarro ka geysanayay maraakiibta isticmaala Badda Cas tan iyo markii uu bilowday dagaalka Gaza sanadkii 2023, taas oo carqaladeysay mid ka mid ah marinnada ugu mashquulka badan ee maraakiibta caalamka.

Ilo militari ayaa sheegay in weerarka cusub uu ujeeddadiisu tahay in laga go'doomiyo magaalada dekedda ah ee Mokha, oo ay ciidamada dowladda hayaan, isla markaana Xuutiyiintu ay u sii gudbaan dhulka ku dhow Bab al-Mandab.

Sida ay sheegeen ilo militari iyo mas’uul ka tirsan magaalada Taiz, dagaalyahannada Xuutiyiinta ayaa qabsaday goobo dhaadheer oo istiraatiiji ah oo dusha ka haya fariisimaha ciidamada dowladda iyo qaybo ka mid ah magaalada Taiz.

Ilo militari ayaa sheegay in goobaha sare ay Xuutiyiinta u sahli karaan inay bartilmaameedsadaan maraakiibta isticmaala marin-biyoodka Bab al-Mandab.

Tirada dadka ku dhintay dagaalka ayaa Jimcihii gaartay 129 qof, sida ay muujisay tirakoob ay AFP ka diyaarisay ilo kala duwan, iyadoo tiradii hore ahayd 81 qof.

Sarkaal ka tirsan ciidamada Yemen oo ka hadlay isagoo codsaday inaan magaciisa la shaacin ayaa sheegay in 66 askari oo ka tirsan ciidamada dowladda lagu dilay dagaallada.

Dhanka kale, ilo caafimaad iyo militari oo xiriir la leh Xuutiyiinta ayaa sheegay in ugu yaraan 62 dagaalyahan oo ka tirsan kooxda lagu dilay iska horimaadyada.

Dagaalladan ayaa noqon kara kuwii ugu dhimashada badnaa ee Yemen ka dhaca sannadihii u dambeeyay, iyadoo sii xoogeysanaya loollanka loogu jiro gacan-ku-haynta xeebaha iyo marin-biyoodka muhiimka ah ee Bab al-Mandab.

Kororka colaadda ayaa sidoo kale sare u qaadaya walaaca laga qabo in dagaalka Yemen uu saameyn ku yeesho isu-socodka maraakiibta ganacsiga iyo amniga badda ee gobolka.

GAROWE ONLINE