Dowladda Britain oo safiir cusub usoo dirsaneysa Soomaaliya

March 17, 2015 (GO)- Dowladda Britain ayaa safiir cusub usoo magacawdey dalka Soomaaliya. Safiirka cusub oo lagu magacaabo Ms Harriet Mathews  ayaa bedeli doonta danjirihii hore Mr Neil Wigan.

War-saxaafadeed kasoo baxay Wasaradda Arimaha Dibadda Britain ayaa lagu sheegay in Harriet Mathews xilka si rasmi ah ula wareegi doonto marka la gaaro bisha June ee soo socota.

Ms Mathews oo ah qof aqoon duruqsan u leh arimaha Afrika ayaa waxaa ay ka soo shaqeysay sadex goobood oo Qaaradda Afrika kamid, waxayna madax kasoo noqotay xafiisyada Bariga iyo galbeedka Afrika ee dowladda Uk.

Danjiraha cusub waxay sidoo kale horay usoo noqotey wakiilka xafiiska arrimaha dibadda ee UK u qaabilsan wadamada Brazil, Israel iyo Afghanistan.

Harriet Mathews markii ugu dambeysey waxay madax ka aheyd waaxda la dagaalanka cudurka Ebola ee Wasaaradda Arimaha Dibadda Britain.

GAROWE ONLINE