Amniga dekadda Boosaaso oo si weyn loo adkeeyay

Maraakiibtan iyo Doonyaha ku xirta marsadda ayaa inta badan shixnada ka keena Imaaraadka iyo Cummaan.

BOOSAASO, Puntland - Ku-simaha Agaasimaha Guud ee Wasaaradda Maaliyadda Mudane Keenadiid Cali Jaamac ayaa kormeer ku tagay Dekadda Magaaladda Boosaaso. Kormeerkan Agaasimaha waxaa ku weheliyey Maamulaha Furdada Boosaaso Mudane Maxamed Yuusuf

Madaxda iyo shaqaalaha Wasaaradda Maaliyadda ee Dekadda Boosaaso ayaa ku hawlan Cashuurista Badeecooyinka kala duwan ee ay wadaan Doonyaha iyo Maraakiibtu.

Maraakiibtan iyo Doonyaha, ayaa inta badan shixnada ka keena Emaaradka iyo Cummaan waxyaalaha ay keenaan waxaa ka mid ah :

1-Raashin

2-Gaadiid

3-Bagaash iyo badeeco kale

Dekadda Boosaaso, oo dhawaan lagu sameeyay Qodniin dhanka Xafaarada ah ayaa suurta gelisay in ay ku soo xirtaan Doonyaha tankoodu yahay 1,500 ilaa 2,000 oo Tan, sida uu Xafiiska Wacyi-gelinta Iyo Warfaafinta Wasaaradda Maaliyadda u sheegay Maamulaha Furdada Boosaaso Mudane Maxamed Yuusuf

Dekadu waa mid mashquul ah ayna ka socdaan dejinta badeecadaha kala.duwan iyo dhoofka Xoolaha oo ay ka mid yihiin Geela, Lo'da iyo Ariga.

Dekada Boosaaso marka lays barbar dhigo Dekadaha kale ee dalka dhanka Cashuurta waa mid aad u hoosaysa 30% shixnadaha ganacsi ee ee ka soo dega Dekadda waa kuwo ay la soo degaan ganacsatada Soomaaliyeed ee gobollada ka baxsan Dowladda Puntland.

Hannaanka shaqo ee cashuurista Badeecadaha waa mid ay siwayn ugu qanceen ganacsatadu waxana ay wada shaqayn la leeyihiin Maamulka Furdada. Dowladda Puntland waxa ay sii xoojisay Amniga Dekada si loo ilaaliyo Hantida ganacsatada Soomaaliyeed ee adeegsada Dekadda Boosaaso.

GAROWE ONLINE