Ciidamada dowladda Somalia iyo Shabaab ku dagaallamay gobolka Baay
-
- Posted On 10-12-2015, 12:36PM
10 Decemeber, 2015(GO)-Kolonyo gawaari la socdeen ciidamo ka tirsan dowladda Somalia waxaa saaka jidka u galay mallayshiyaad ka tirsan Al-Shabaab, waxaana ka dhashay dagaal sababay khasaaro dhawac iyo dhimasho isugu jira.
Dagaalkan ayaa ka dhacay tuulo lagu magacaabo Loon oo ka tirsan degmada Diinsoor ee gobolka Baay.Waxaana wararka aan helayno sheegayaan inay dhinteen saddex ka tirsan ciidanka dowladda, halka khasaaro aan la xaqiijin soo gaaray Al-Shabaab.
Goob joogayaal ku sugan degmada Diinsoor ayaa sheegaya in dagaalkaasi ciidanka dowladda looga furtay qoryaha fud fudud ee loo yaqaano AK47, balse saraakiisha ciidamadu ma shaacin waxayna tilmaameen inuu ahaa weerar gaadmo ah.
Ururka Al-Shabaab ayaa weeraro gaadmo ku gaado ciidamada dowladda Somalia iyo AMISOM ee ku sugan Koonfurta Somalia.
GAROWEONLINE
