Puntland: Diiwaan-gelin hubeysan iyo firaaq dastuuri oo laga digay

Siyaasiyiin madal uga dhawaaqay Garowe ayaa si adag u eedeeyay xukuumadda madaxwayne Saciid Deni.

GAROWE, Puntland - Madasha Siyaasiyiinta Puntland ayaa looga dhawaaqay magaaladda Garowe. Musharaxiintan madaxwayne ayaa xukuumadda Deni ku eedeeyay "marin-habaabinta" iyo "leexinta" dhabaha dimuqraadiyada.

Talaabadan ayay ka digeen in ay keento firaaq dastuuri ah. "Diiwaan-gelinta hubeysan" ayay dalbadeen in la joojiyo. Beesha Caalamka ayay ku waaniyeen "in aysan taageerin geedi-socod horseeda xasilooni daro".

Mar ay ka hadlayeen xaaladda Laascaanood ayay sheegeen "Madashu waxy canbaaraynaysaa xasuuga lagu hayo shacabka magaalada Laasaanood o maamulka Somaliland si xoog ah ku haysto".

"Madashu waxay ka tacsiyeynaysaa dada sida arxan darrada ah magaalada loogu laynayo. Madashu waxy ugu baaqaysaa xukuumadda iyo shacabka Puntland in ay garab istaagaan kacdoonka shacabka reer Sool," ayay raaciyeen.

Iyaga oo farin u diraya xukuumadda Deni ayay tibaaxeen "Waa in Xukuumadda Madaxweyne Saiid Cabdullahi Deni aysan horseedin qalalaase iyo firaaq dastuuri ah oo Puntland ka dhaca, lagana fogaado waxkasta o horseedi kara hubanti la'aan siyaasadeed".

Xilli ay la dardaarmayeen Beesha Caalamka ayay caddeeyeen "Madashu iyada o bogaadinaysa taageerada deeq-bixiyayaasha, hadana waxay ka digaysaa in aysan qeyb ka nogon hannaan doorasho xasilooni darro abuuri kara".

Dhawaqa siyaasiyiintan ayaa waxa uu kusoo hagaagayaa xilli Deni uu shalay warbaahinta kula hadlay Garowe isla markaana uu muujiyey in uusan diyaar u ahayn doorasho la isla ogol-yahay iyo in uu awood ku fulin doono dantiisa gaarka.

HOOS KA AKHRISO BAYAANKA SIYAASIYIINTA

GAROWE ONLINE