Ururka Mideeye oo ka hadlay 23-ka xubnood ee ka baxay

GAROWE, Puntland - Urur siyaasadeedka Mideeye ayaa Axada maanta ah wuxuu si rasmi ah u aqbalay 23-ka xubnood ee ka baxay golaha dhexe ee ururkaas, sidda ku xusan war qoraal ah oo uu soo saarey.

War-saxaafadeedkan ku taariikheysan 11-ka July, 2021 ayuu ku shaaciyey in talaabadan ka dambeysay markii la xalin waayey tabasho ay ka muujiyeen go'aano ururku qaatay.

Sida ku xusan warqaddan, khilaafka oo taagan muddo 10-bilood ah ayaa ka dhashay kadib markii ururka uu soo dhaweeyay war-murtiyeedka kasoo baxay wadahadaladdii Dhuusamareeb 3.

Balse, laguma soo hadal-qaadin shirka uu faray guddiga ku meelgaarka doorashooyinka Puntland kaasoo war-saxaafadeed uu soo saarey ku caddeeyay in uu goobjoog ka noqon doono kulankaas.

Bayaanka TPEC oo GO u xaqiijiyeen illo wareedyo xog-ogaal ah waxaa qeyb ka ahaa go'aano la xiriira is-mari-waagan sababay in ururka ay isaga baxaan 23 siyaasi oo kamid ahaa kuwa aas-aasay ururkaas.

Go'aanadda ayaa kala ah;

1) In golaha dhexe ee ururka uu yeesho fadhigisii caadiga ahaa kahor 27-da bisha July, 2021 xilligaas oo laga joogo hal sano kahor kulan sanadeedkii hore ee golaha dhexe

2) In ajandaha kulanka lagu darro; dhismaha guddiyadda dhiman, warbixinta waxqabadka guddiga fulinta, iyo saxiixida, bedelida ama diidmadda warbixinta waxqabadka.

3) In guddiga ku meelgaarka ah ee doorashooyinka Puntland uu goobjoog ka noqonayo kulanka si uu u xaqiijiyo habsami u socodka shirka iyo sida loo maareeyo qodobadda kor ku xusan

War-saxaafadeedka oo uu saxiixay guddoomiyaha ayaa waxaa lagu soo gabagabeeyay in guddiga TPEC uu go'aanadan awood u siinayaan xeerarka doorashooyinka dowlada Puntland iyo kan urur siyaasadeedka.

Hoos ka akhriso qoraalka Mideeye

GAROWE ONLINE