Xukuumada Deni oo lagu eedeeyay "soo nooleynta" qabyaalada

Madasha Siyaasadda Puntland ayaa war-saxaafadeed kasoo saartay kulamadii ay ka samaysay goboladda Bari, Karkaar iyo Gaardafuu.

GAROWE, Puntland - Madasha Siyaasadda Puntland ayaa war-saxaafadeed kasoo saartay kulamadii ay ka samaysay goboladda Bari, Karkaar iyo Gaardafuu mudadii u dhaxeysay 12-17 bishaan Janaayo, 2023.

Diiwaan-gelinta lagu muran-san yahay ayay madashu sheegeen in bulshada gobaladaas ay iska diideen iyaga oo walaac ka muujiyay dano muddo kororsi oo ay xambaarsantahay.

Guddiga kumeel gaarka ah ee doorashooyinka Puntland ayay ku eedeeyeen in uu hareer maray habraacyadii doorashooyinka iyaga oo ku tilmaamay diiwaan-gelinta "mid aan loo dhamayn oo uu khilaaf hareeyay".

Xukuumadda Deni ayay tibaaxeen in ay soo noolaysay qabyaaladda iyo qabiilka iyada oo kusoo aadayso eedayntu xilli xukuumadda Puntland ay dhawaanahan ku hawlanayd qabashada kulamo ay beeluhu si gaar-gaar ah ugu taageerayaan hanaankaan.

Barakacayaasha ayay madashu ku celisay markale in xuquuqdooda lagu tuntay iyada oo sheegtay in arintaasi uu hormuud u yahay ururka ''KAAH'' ee uu hogaamiyo madaxweyne Saciid Cabdullaahi Deni.

Muddo kororsiga, sidda ay sheegeen, in ay damacsan tahay xukuumadda Deni ayay madashu ku baaqday in ay joojiso marin habaabinta shacabka iyo takri-falka dhaqaalaha shacabka.

Isimada, cuqaasha, waxgaradka iyo bulshadda Puntland ayay cod dheer ugu baaqeen mas'uuliyiinta madashu in laga hortago hubanti la'aan siyaasadeed oo Puntland ka dhacda si loo gaaro damac shakhsi ah.

GAROWE ONLINE