Al-shabab oo xalay soo weerartey xabsiga dhexe ee Beledweyn
-
- Posted On 10-08-2015, 07:18AM
August 10, 2015 (GO)- Al-shabaab ayaa xalay saqdii dhexe soo weerartay xabsiga dhexe ee magaalada Beledweyn.
Dagaal muddo nus saac ku dhow socdey ayaa dhex maray kooxda weerarka soo qaaddey iyo ilaalada xabsiga.
Gaashaanle Maxamed Cadaay oo kamid ah saraakiisha booliska Beledweyn ayaa warbaahinta u sheegay in ilaalada xabsigu weerarkaas si xooggan isaga caabiyeen.
Wuxuu intaas ku daray in wax khasaare ahi soo gaarin booliska haseyeeshee dhanka kale waxyeello xooggani soo gaartey.
"ciidamadu si xooggan ayey isaga caabiyeen kooxaha nabad-diidka...markii dambe way baxsadeen welina waa ku raad joognaa" ayuu yiri
Al-shabaab ayaa sanadkii 2011 laga saaray degmada Beledweyn ee xarunta gobolka Hiiraan, haseyeeshee kooxda ayaa weli gacanta ku haysta deegaano dhowr ah oo gobolkaas ka tirsan.
Weerarka xalay ayaa kusoo aadaya xilli maalmihii u dambeeyey hawlgallo militeri oo Al-shabaab ka dhan ahi ka soconayeen galbeedka gobolka Hiiraan.
GAROWE ONLINE
