Arday Soomaaliyeed oo loo diiday Fiisaha Denmark xili uu helay Deeq Waxbarasho oo Midowga Yurub ah

København, Denmark – Bilowgii sanadkan, Mustaf Maxamed Takoy, oo ah arday Soomaaliyeed 30 jir ah, ayaa si weyn ugu farxay markii uu helay deeq waxbarasho oo buuxda oo Erasmus Mundus ah, taasoo uu ku baran lahaa Master-ka laba sano ah ee Global Environment and Development jaamacadda University of Copenhagen ee Denmark. Barashadiisu waxay ahayd in ay bilaabato bisha September.

Si uu u helo fiisaha uu ugu safro Denmark, Takoy wuxuu si rasmi ah u gudbiyay codsigiisa fiisaha. Balse laba bilood kadib, wuxuu helay warqad diidmo ah oo ka timid hay’adda SIRI ee socdaalka Denmark, taasoo sheegtay in dowladda Denmark aysan aqoonsanayn baasaboorka Soomaaliya inuu yahay dukumeenti safar oo sax ah – iyadoo aan loo eegeyn deeqda waxbarasho iyo oggolaanshaha jaamacadda ee uu helay.

“Qof leh deeq buuxda oo Erasmus Mundus ah, oggolaansho jaamacadeed, xitaa caymis caafimaad leh – haddana waxaas oo dhan laga indho-tiray, kaliya baasaboorka la iiga qaaday go’aanka. Ma anaa doortay in aan ku dhasho Soomaaliya? Qofna ma doorto halka uu ku dhasho,” ayuu yiri Takoy isagoo ka warbixinaya niyad-jabkiisa.

Si ay u muujiyaan taageeradooda, 36 kamid ah ardayda dhigata isla barnaamijka Takoy ayaa si wadajir ah u qoray warqad ay u direen Guddiga Racfaanka ee Socdaalka, iyagoo ka codsaday in go’aanka dib looga fiirsado. Waxay ku doodeen in “aqoonta iyo kartida ardayga, ee aan ahayn jinsiyadda, ay tahay waxa lagu qiimeeyo codsadayaasha” iyo in “codka iyo aragtida Mustaf ay muhiim u yihiin ruuxa isku dhafka ah ee barnaamijka Erasmus.”

Dhankiisa, Takoy wuxuu gudbiyay racfaan uu isagu gaar u qoray oo uu ku bixiyay $140, balse ilaa hadda kama helin wax jawaab ah Guddiga Racfaanka.

Inkasta oo uu wajahayo xaalad adag, Takoy weli rajo ayuu qabaa. “Waan niyad-jabey, waana niyad-xumo, balse rajada ma lumin. Sanadka dambe waxaan mar kale dalban doonaa deeqo waxbarasho, rajadeydu waa in aan fursad kale helo,” ayuu yiri.

Warbixintan waxay iftiiminaysaa caqabadaha horyaalla ardayda Soomaaliyeed ee doonaya waxbarasho caalami ah, iyadoo muujinaysa baahida loo qabo in la tixgeliyo aqoonta iyo dadaalka ardayda halkii lagu qiimeyn lahaa asal ama jinsiyad.

GAROWE ONLINE