Baarlamanka oo cod aqlabiyad leh ku ansixiyay Xukuumadda Cusub

MUQDISHO, Soomaaliya - Xildhibaanada Aqalka Hoose ee Baarlamaanka Soomaaliya ayaa kalsoonida siiyay Gollaha Wasiiradda ee uu soo dhisay dhawaan Ra'iisul Wasaare Maxamed Xuseen Rooble.

Afhayeenka Gollaha Shacabka ayaa ku dhawaaqay in dhamaan Xildhibaanadii kulanka soo xaadiray Maanta oo gaaraya 188 ay ansixiyeen Xukuumadda, isagoo intaasi ku daray hadalkiisa inaysan jirin Xildhibaan diiday ama mid ka aamusay.

Rooble ayaa mudo bil ah ku qaadatey inuu kusoo magacaabo Wasiiradda, oo in ka badan 50% ay yihiin xubno laga soo xulay Xukuumaddii Xasan Cali Khayre, ee la riday 25-kii July 2020.

Mudo 3 bilood ah ayaa u harsan mudo xileedka dowladda, waxaan Wasiiradda cusub u taalla howl culus, oo ay ugu horeyso doorashadda oo sida uu dhigayo heshiiskii madaxda dalka la doonayo in 1-da December billaabato.

GAROWE ONLINE