Sheekh Shariif oo Maxkamadda Sare u gudbiyey dacwad ka dhan ah Xasan Sheekh

MUQDISHO — Madaxweynihii hore ee Soomaaliya, Sheekh Shariif Sheekh Axmed, ayaa dacwad u gudbiyey Maxkamadda Sare, isaga oo dalbaday in la buriyo wax-ka-beddelka Dastuurka ku-meel-gaarka ah iyo go’aannada ka dhashay, kuwaas oo uu ku tilmaamay kuwo aan loo marin habraacyada sharciga ah.

Sheekh Shariif ayaa sidoo kale diiday jadwalka doorashooyinka 2027 ee ay ku dhawaaqday Guddiga Madaxa-bannaan ee Doorashooyinka Qaranka iyo Soohdimaha, isaga oo ka digay in muranka siyaasadeed uu dalka u horseedi karo doorashooyin isbarbar socda iyo isku dhac.

War uu soo saaray Khamiistii ayuu ku sheegay in jadwalka doorashada uu yahay mid hal dhinac ah, isla markaana aan la helin heshiis siyaasadeed oo loo dhan yahay oo saldhig u noqda habka doorashooyinka dalka.

“Dacwaddu waxay dalbanaysaa in la buriyo wax-ka-beddelka dastuurka ee lagu muransan yahay iyo go’aannada ka dhashay,” ayuu Sheekh Shariif ku sheegay bayaankiisa.

Madaxweynihii hore ayaa ka digay in doorashooyin la qabto iyada oo aan heshiis ballaaran laga gaarin hannaanka doorashada ay sii xoojin karaan kala qaybsanaanta siyaasadeed, wiiqi karaan hay’adaha dowladda, isla markaana abuuri karaan muran ku saabsan cidda xaqa u leh hoggaaminta dalka.

Wuxuu Madaxweyne Xasan Sheekh Maxamuud ugu baaqay inuu joojiyo tallaabooyinka uu ku tilmaamay kuwo hal dhinac ah, isla markaana uu wadahadal la furo hoggaamiyeyaasha mucaaradka iyo dowlad-goboleedyada si heshiis qaran looga gaaro hannaanka doorashooyinka.

Sheekh Shariif ayaa sidoo kale Maxkamadda Sare ka codsaday inay si madax-bannaan u qaaddo dacwadda dastuuriga ah, isaga oo beesha caalamkana ugu baaqay inay taageerto dadaallada lagu xallinayo khilaafka siyaasadeed ee Soomaaliya iyada oo loo marayo wadahadal.

Dacwadda ayaa timid saacado kaddib markii guddoomiyaha guddiga doorashooyinka, Cabdulqaadir Axmed Xasan, uu ku dhawaaqay jadwalka doorashooyinka heer federaal, kaas oo dhigaya in doorashooyinka labada aqal ee Baarlamaanka Federaalka la qabto 15-ka Abriil 2027, halka doorashada madaxweynaha loo asteeyey 15-ka May 2027.

Guddiga doorashooyinka ayaa sheegay in jadwalkaasi waafaqsan yahay Dastuurka iyo shuruucda doorashooyinka dalka.

Hase yeeshee, dowladda federaalka, mucaaradka iyo qaar ka mid ah dowlad-goboleedyada ayaa weli isku khilaafsan hannaanka doorashooyinka iyo muddo-xileedyada hay’adaha dowladda.

Khilaafka ayaa salka ku haya wax-ka-beddelka dastuurka, qaabka loo qabanayo doorashooyinka iyo baahida loo qabo heshiis siyaasadeed oo ay dhinacyadu ku mideysan yihiin.

Dacwadda Sheekh Shariif ayaa hadda Maxkamadda Sare hor dhigaysa muranka dastuuriga ah, iyadoo aan weli la shaacin go’aan maxkamadeed oo ku saabsan codsigiisa.

GAROWE ONLINE