Booliska Soomaaliya oo qabtay xubin ka tirsanaa Amniyaatka Al-Shabaab

MUQDISHO, Soomaaliya – Booliska Soomaaliya ayaa gacanta ku dhigtey xubin ka tirsan Al-Shabaab isla markaana burburiyey shabakado ka tirsanaa xoogagaas, sidda uu warbaahinta u sheegay afhayeenka taliska.

Dhame Sadiiq Adan Cali [Duudishe] oo maanta xafiiskiisa ugu waramay saxaafada ayaa magaca xubinta Shabaabka oo ay qabteen ku sheegay Xasan Cabdullaahi Salaad oo magaciisa afgarashadda uu yahay Bukhaari.

15-kii June, 2020 abaare 11-kii barqanimo ayuu xusay in ay kasoo xireen aaga Tabakaaya-madow ee degmadda Dharkenley.

Sidda laga soo xigtay afhayeenka, wuxuu u howlgalayey Amniyaat-ka Al-Shabaab ahaan. Sidoo kale, wuxuu kasoo dagaalamay gobolka Hiiraan. "Laba dhagar-qabe kale ayaa lala soo xiray iyagoo fal-dambiyeed ku jira".

Ma caddeyn hadii ay sameeyeen iska hor-imaad ka dhashay waxyeelo soo gaarey ciidamadda soo qabtay iyo eedeysaneyaasha qudhooda.

Dhanka kale, shabakado Al-Shabaab ka tirsan ayuu ka dhawaajiyey in 30-ka bishii May, 2020 ay ciidamadda bileyska ku burburiyeen isgoyska Ex-kontarool Afgooye ee duleedka magaala madaxda iyo degmada Dharkenley.

Afhayeenka ayaa daaha ka rogay in shabakadaan ay adeegsan jireen Istuudiyow lagu cayaaro Jeeska "oo ay ku qarin-jireen howlgaladooda".

Hase ahaatee, ma uusan soo bandhigin magacyadda iyo tiradda shabakadaha. Su'aallo arrintaas laga waydiiyeyna kama jawaabin.

"Dhamaantooda waxay ku jiraan gacanta hay'adda dambi-baarista, waxaana ka horgeyn doonaa maxkamadda sharciga u leh," ayuu xusay.

Booliska Soomaaliya ayaa bilooyinkii lasoo dhaafay sheegay in uu xoojiyey howlgaladda lagu xasilinayo ammaanka magaala madaxda kahor doorashooyinka aan wali lagu heshiin ee loo qorsheeyay sanadka 2020-21.

GAROWE ONLINE