Britain oo taageeraysa doorasho xor ah oo ka dhacda Somalia
-
- Posted On 06-10-2015, 07:44AM
06 Octobar, 2015(GO)-Dowladda Britain ayaa sheegtay inay ka go'antahay taageerada ay siinayaan dowladda Somalia iyo xoojinta hiigsiga lagu doonayo in dalka ka dhacdo doorasho xor ah sannadka dambe.
Danjiraha Somalia ee Ingiriiska Harriet Mathews oo ka hadlaysay shir jara'id oo ay ku qabatay Muqdishu ayay tilmaamtay inay doonayaa qabsoomidda doorasho dhacda 2016.
Ciidamada Britain Somalia u soo dirayso ayay ka hadashay, waxayna sheegtay inaysan noqon doonin kuwo ka dagaalama balse bixin doonaan tababaro iyo xogo ku aadan dagaalka Dowladda Somalia kula jirto ururka Al-Shabaab.
Harriet Mathews ayaa xustay inay ka go'antahay dowladda Britain gargaarka bini-adanimo oo la siinayo shacabka Somalia.
Dhawaan ayay ahayd markii dalka Ingiriisku shaaciyay inay u dirayso Somalia ciidamo, xilli beesha caalamku waddo dadaalo lagu doonayo sidii dalka Somalia uga dhici lahayd doorasho, maadama xukumadda hadda jirta ku guuldarrayastay inay dhacdo sannadka dambe doorasho hal qof iyo cod ah.
GAROWEONLINE
