Burcad-badeedda Soomaaliya oo dilay shan ka mid ah shaqaalihii markab laga soo furtay

GAROOWE, Soomaaliya — Burcad-badeed Soomaali ah ayaa dilay shan ka mid ah shaqaalihii saarnaa markab shidaal oo ka babanayay calanka Palau, ka hor inta aysan ciidamada ammaanku soo furin markabka, sida ay sheegeen mas’uuliyiinta Soomaaliya.

Dhimashada shaqaalaha saarnaa markabka MT Honour 25 ayaa la xaqiijiyay Talaadadii, kaddib markii ciidamada Puntland ay howlgal ku soo furteen markabka oo ay gacanta ku dhigeen 16 qof oo looga shakisan yahay inay burcad-badeed yihiin.

Wasaaradda Warfaafinta Puntland ayaa sheegtay in burcad-badeeddu ay dileen shanta shaqaale ah ka hor inta uusan bilaaban howlgalka lagu soo badbaadinayay markabka. Dadka la dilay waxaa ka mid ahaa saddex Pakistani ah, hal qof oo u dhashay Myanmar iyo hal Hindi ah.

Wasaaraddu waxay sidoo kale sheegtay in afar shaqaale oo kale ay ku dhaawacmeen weerarka, kuwaas oo saddex ka mid ah ay yihiin Pakistani, halka midka kalena uu yahay Hindi.

Markabka MT Honour 25, oo sida 18,500 fuusto oo shidaal ah, ayaa burcad-badeeddu qafaasheen 21-kii Abriil, xilli uu marayay xeebaha Soomaaliya.

Ciidamada Booliska Badda Puntland ayaa sheegay in markabka uu hadda ammaan ku jiro, isla markaana uu gacanta ugu jiro dowladda. Ciidamada ayaa sidoo kale sheegay in ay socdaan dadaallo lagu raadinayo dad kale oo lala xiriirinayo afduubka.

Howlgalkan ayaa yimid toddobaad kaddib markii ciidamada badda Puntland ay soo furteen markabka Sibu 1, oo burcad-badeeddu qafaasheen bishii Agoosto. Si kastaba, 28 ka mid ah 41 qof oo loo qabtay afduubka ayaa markii dambe ka baxsaday xilli loo waday xabsiga, iyadoo saraakiil amni oo Puntland ah ay ku eedeeyeen booliska maxalliga ah inay ku lug lahaayeen baxsashada.

Mas’uuliyiintu waxay sheegeen in ugu yaraan 15 weerar oo burcad-badeednimo ah laga soo sheegay xeebaha Soomaaliya tan iyo bishii Abriil.

Mowjad hore oo burcad-badeednimo ah oo Soomaaliya ka dhacday intii u dhexeysay 2008 iyo 2014 ayaa carqalad weyn ku keentay mid ka mid ah marin-biyoodka ganacsi ee ugu mashquulka badan dunida, iyadoo ay burcaddu qaateen boqolaal milyan oo doollar oo madax-furasho ah.

GAROWE ONLINE