Cabdi Xaashi oo "ka qeybgalaya" shirka Dhuusamareeb

MUQDISHO, Soomaaliya - Afhayeenka Aqalka Sare ee baarlamaanka Soomaaliya, Cabdi Xaashi Cabdullaahi, ayaa ogeysiiyey madaxweynaha Galmudug, Axmed Cabdi Kaariye, in uu ka qeybgalayo shirka Dhuusamareeb.

Qoraalka Cabdi Xaashi u diray Qoor-qoor waxaa ogeysiis lagu siiyey madaxweynaha dowladda Soomaaliya, Maxamed Cabdullaahi Farmaajo, iyo hogaamiyeyaasha maamul goboleedyadda oo qudhooda kasoo muuqanaya wadahadalka.

Ma cadda hadii Cabdi Xaashi uu casuumaad rasmi ah u haysto ka qeybgalka wadaxaajoodka oo qorshuhu yahay in todobaadkan uu ka bilowdo magaala madaxda dowlad goboleedka Galmudug ee Dhuusamareeb.

Mr Xaashi ayaa wargelintiisa ka qeybgalka shirka wuxuu u cuskaday maadaama qodobadda khilaafka ka taagan yahay ay kamid tahay qadiyadda xulista wakiilada Somaliland oo isaga uu degaan ahaan uu kasoo jeedo.

Dhawaqa Cabdi Xaashi ayaa kusoo hagaagaya saacado kadib markii Midowga Musharaxiinta ay ku baaqeen in la balaariyo ka qeybgalka shirka Dhuusamareeb fursadna la siiyo saamileyda uu Cabdi Xaashi kamid yahay.

Xaashi iyo Musharaxiinta ayaa kulmay Axadii. Warar ku dhow shirka waxay sheegayaan in ay isla soo qaadeen in uu ka qeybgalo shirka Dhuusamareeb si qadiyada xubnaha Somaliland uu xalkeeda door ugu yeesho.

Madaxtooyadda Soomaaliya ayaa afhayeenka Senate-ka waxaa kala dhaxeeya xiriir aanan wanaagsaneyn, waxaana uu ka hor-yimid qorshaha uu Farmaajo ku doonayo in uu doorashadda soo aadan ku difaacdo kursiga uu ku fadhiyo.

Hoos ka akhriso qoraalka Cabdi Xaashi

GAROWE ONLINE