Cali Balcad oo la kulmay Senator Mareykan ah oo taageersan aqoonsiga Somaliland

Muqdisho – Wasiiru-Dowlaha Arrimaha Dibadda ee Dowladda Federaalka Soomaaliya, Cali Cumar Cali (Cali Balcad), ayaa Sabtidii magaalada Washington kula kulmay Senator Ted Cruz, oo ah xubin ka tirsan Golaha Senate-ka Mareykanka kana mid ah siyaasiyiinta ugu codka dheer ee u ololeynaya in Mareykanku si rasmi ah u aqoonsado Somaliland.

Kulankaas ayaa u dhacay si gaar ah, iyadoo Senator Cruz uu yahay Guddoomiyaha Guddiga Hoosaadka Afrika ee Xiriirka Caalamiga ah ee Senate-ka Mareykanka. Wasiir Cali Balcad ayaa uga mahadceliyay Mareykanka taageerada uu siiyo Soomaaliya, isaga oo ku tilmaamay Soomaaliya "dal safka hore kaga jira la-dagaallanka argagixisada" iyo "lamaanaha istiraatiijiga ah" ee gobolka Geeska Afrika.

"Taageerada Mareykanka waa mid muhiim u ah guusha dagaalka lagula jiro Al-Shabaab iyo Daacish, sidoo kalena waxay muhiim u tahay amniga marinada ganacsiga ee badda," ayuu yiri Cali Balcad. "Waa in aan xoojinno iskaashigeenna si aan u helno Soomaaliya xasilloon oo barwaaqo ah."

Wasiirku ma uusan xaqiijin in arrinta aqoonsiga Somaliland laga hadlay kulanka, hase yeeshee warbaahinta Mareykanka ayaa sheegtay in Senator Cruz uu weli wado dadaallada uu ku doonayo in Mareykanku u aqoonsado Somaliland dowlad madax-bannaan.

Xaaladda Amni iyo Istiraatiijiyadda Gobolka

Kulanka ayaa kusoo beegmaya xilli dagaalka dowladda Soomaaliya kula jirto Al-Shabaab uu weli taagan yahay, iyadoo ay sare u kacday weerarrada ay kooxdu ka fulinayso gobollada dhexe. Sanadkan 2025, Al-Shabaab ayaa weerarro culus ka fulisay gobollada Shabeellaha Dhexe, Shabeellaha Hoose iyo Hiiraan, iyadoo Kooxda la wareegtay Aadan Yabaal, Moqkori iyo Maxaas.

Ciidamada Mareykanka ayaa sii wada duqeymaha cirka ah ee lagu beegsanayo Al-Shabaab, kuwaasoo ilaa bishii Sebtembar 2025 laga fuliyay qeybo ka mid ah Soomaaliya.

Senator Cruz iyo Ololaha Aqoonsiga Somaliland

Senator Cruz ayaa noqday mid ka mid ah siyaasiyiinta ugu cadcad ee Mareykanka ee u ololeynaya aqoonsiga Somaliland. Bishii Agoosto 2025, ayuu warqad u diray Madaxweyne Donald Trump, isagoo ku sheegay in Somaliland ay tahay "lamaanaha muhiimka ah ee dhinaca ammaanka iyo diblomaasiyadda," isagoo xusay doorashooyinkeeda nabdoon, meesha ay ku taallo (Gacanka Cadmeed), iyo diyaar u ahaanshaheeda martigelinta saldhig milatari oo Mareykanku ka sameysto Berbera.

Waxa uu sidoo kale xusay kheyraadka dabiiciga ah ee Somaliland, gaar ahaan macdanta sida lithium-ka, iyo xiriirka ay la leedahay Taiwan. Cruz wuxuu sidoo kale ku eedeeyay Shiinaha inuu garab siinayo dowladda Muqdisho si ay u hor istaagto riyada Somaliland ee aqoonsi, isagoo tusaale u soo qaatay mamnuucista baasaboorka Taiwan ee ay dhowaan Soomaaliya ku dhawaaqday.

Mowqifka Dowladda Federaalka iyo Mareykanka

Dowladda Federaalka Soomaaliya ayaa si degdeg ah u cambaareysay warqadda Senator Cruz, iyadoo mar kale ku celisay in midnimada dhuleed ee dalka aysan wax gorgortan ah geli karin. 

Wasaaradda Arrimaha Dibadda ee Mareykanka ayaa mar kale xaqiijisay bishii la soo dhaafay in Mareykanku uu aqoonsan yahay madax-bannaanida iyo midnimada dhuleed ee Jamhuuriyadda Federaalka Soomaaliya, isla markaana aysan jirin wadahadallo rasmi ah oo socda oo ku saabsan aqoonsiga Somaliland.

GAROWE ONLINE