Ciidamada Jabuuti oo ka feejigan weerarka Al-Shabaab

JALALAQSI - Taliyaha Qeybta 4-aad ee Hawlgalka Taageerada iyo Xasilinta Midowga Afrika ee Soomaaliya (AUSSOM), Kornayl Cabdiraxmaan Rayaale, ayaa booqasho shaqo ku tegay degmada Jalalaqsi ee gobolka Hiiraan si uu u qiimeeyo xaaladda amni iyo baahiyaha bulshada deegaanka.

Intii uu socday kormeerkan, Kornayl Rayaale wuxuu si dhow ula kulmay ciidamada Jabuuti ee qeybta ka ah AUSSOM ee halkaas ku sugan, isagoo ku bogaadiyay shaqadooda geesinimada leh iyo doorka ay ka qaadanayaan dagaalka lagula jiro Al-Shabaab. Wuxuu sidoo kale ku dhiirrigeliyay inay kor u qaadaan feejignaanta iyo wadashaqeynta si loo xoojiyo guulaha la gaaray.

Kulammo uu la yeeshay mas’uuliyiinta deegaanka, oo ay kamid yihiin Guddoomiyaha degmada Jalalaqsi, Nuur Absuge, iyo Taliyaha Ciidamada Degaanka, Kornayl Cabdinasiir Cali, ayaa diiradda lagu saaray sidii loo xoojin lahaa wada-shaqeynta amniga iyo la dagaallanka Al-Shabaab. Mas’uuliyiintu waxay isla qaateen muhiimadda ay leedahay in si buuxda loo mideeyo howlgalka iyo iskaashiga bulshada.

Booqashada Kornayl Rayaale kuma ekeyn dhinaca milatariga oo kaliya – wuxuu sidoo kale gaaray Isbitaalka Guud ee Jalalaqsi, halkaas oo uu warbixinno kaga dhageystay shaqaalaha caafimaadka iyo maamulka isbitaalka. Ujeedada booqashadan ayaa ahayd in si dhab ah loo fahmo caqabadaha caafimaad iyo kuwa bani’aadanimo ee ka jira deegaanka, iyadoo lagu talo jiro in laga baaro fursado lagu kordhin karo taageerada dadka deegaanka.

Safarka ayaa ku soo beegmeysa xilli AUSSOM iyo dowladda Soomaaliya ay wadaan dadaallo ballaaran oo lagu xasillinayo deegaannada laga saaray Al-Shabaab, iyadoo la doonayo in la helo nabad waarta oo ku saleysan iskaashi dhow oo u dhexeeya ciidamada, maamulka iyo bulshada rayidka ah.

GAROWE ONLINE