Ciidamada Kenya iyo Al-shabaab oo ku dagaallamay J. Hoose
-
- Posted On 18-05-2015, 11:08AM
May 18, 2015 (GO)- Dagaal xooggan oo u dhexeeya ciidamada Kenya ee qaybta ka ah AMSIOM iyo ururka Al-shabaab ayaa ka dhacay deegaanka Xareeri-Hoosley ee ku yaalla gobolka Jubbada Hoose gaar ahaan xadka u dhexeeya Somalia iyo Kenya.
Iska-hor-imaadka ayaa bilowdey kadib markii kooxo ka tirsan Al-shabaab jidka u galeen kolonyo ciidanka Kenya kamid ah oo kasoo baxay fariisin ay ku leeyihiin deegaanka Khadiijo Xaaji.
Inta la ogyahay shan askari oo ka kala tirsanaa labada dhinac ayaa dagaalka ku geeriyoodey, waxaa sidoo kale la gubey mid kamid ah gaadiidka gaashaaman ee ciidamada Kenya.
Rasaas culus ayey labada dhinac isku rideen, waxaana dagaalka ka qayb qaatey diyaaradaha dagaalka, sida laga soo xigtey dadka deegaanka.
Ciidamo Kenyan ah oo gurmada ayaa goobta soo gaarey, waxaana deegaanka lagu dagaalmay ka qaxay tobannaan qoys oo reer guuraa u badnaa.
GAROWE ONLINE
