Ciidamada Soomaaliya oo gubay gaari qarax lagu soo rakibay
-
WARIYAHA MUQDISHO GAROWE ONLINE
- Posted On 15-03-2021, 08:49AM
MUQDISHO, Soomaaliya - Taliska ciidanka Soomaaliya ayaa Isniinta maanta ah wuxuu sheegay in ay gubeen gaari noociisu yahay Saaruf oo lagu soo xiray waxyaabo qarxa.
Sidda laga soo xigtay taliska, gaariga oo uu waday naftii halige ka tirsan ururka Al-Shabaab ayaa lagu gubay degaanka Tooratoorow ee gobolka Shabeellaha Hoose.
Jeneraal Odowaa Yuusuf Raage, taliyaha guud ee ciidamadda Soomaaliya oo u waramay Idaacada ku hadasha afka ciidanka, ayaa sheegay in ciidanku hayeen xogta gaariga.
"Ciidanka kumaandooska Danab ayaa howlgal ay saaka sameeyeen waxay ku guuleysteen in ay ka hortagaan falkaas argagixiso," ayuu yiri. "Gaariga wuxuu kusii jeeday Muqdisho".
Balse, taliyaha ma uusan bixin tafaasiil ku saabsan qaabka loo gubay gaariga iyo aaladda ay adeegsadeen ciidanka Danab ee Mareykanka uu tababaray.
Sawirro iyo muuqaalo ay baahisay warbaahinta dowladda oo la sheegay in laga soo qaadey goobta lagu gubay gaariga ayaa muujinaya Uuro cirka isku sii shareereysa.
Gubida baabuurka ayaa kusoo hagaagaya xilli maalmihii lasoo dhaafay ay jireen digniino dhanka ammaanka ah oo ku saabsan in Al-Shabaab qaraxyo gaari ay fulin karto.
GAROWE ONLINE
