Ciidanka Itoobiya oo "dilay" xubno ka tirsan Al-Shabaab
-
WARIYAHA BAYDHABO GAROWE ONLINE
- Posted On 28-02-2021, 03:50PM
ADDIS ABABA, Ethiopia – Ciidamada Difaaca Qaranka Itoobiya ee [ENDF] ayaa sarre-u-qaadey weerarada ka dhanka ah maleeshiyada Al-Shabaab ee ku sugan koonfurta dalka, howlgaladii ugu dambeeyay la sheegay "in looga golleeyahay in dalka looga sifeeyo dagaalameyaasha dhibaatada ka wada Soomaaliya".
Ciidamada Difaaca Qaranka ee Itoobiya ayaa ka howlgala deegaano ka tirsan Koonfur Galbeed iyo qeybo ka mid ah Jubaland, halkaas oo ay isku dayayeen inay ka xoreeyaan xoogaga gacansaarka la leh shabakadda argagixisada ah ee Al-Qaacida. Waxay markii ugu horeysay ka qeyb galeen howlgalo ka dhacay magaalada Muqdisho ka hor inta aysan AMISOM kusoo biirin.
Maxamed Mukhtaar Cabdi, oo ah gudoomiye ku xigeenka degmada ee dhanka amaanka, ayaa saxaafadda u sheegay in ciidamadu ay ku guuleesteen in ay bur buriyaan ugu yaraan 9 maleeshiyo oo ka tirsan Al-Shabaab, kuwaas oo hadafkoodu ahaa "in ay weeraraan fariisimahooda marka laga soo tago in ay weeraraan dad rayid ah oo aan waxba galabsan".
Dagaalyahanada ayuu sheegay inay bartilmaameedsadeen degmada Qansaxdheere ee gobolka Baay oo hoostagta maamulka koonfur galbeed.
Tani waa markii ugu horreysay oo ay ciidamada Itoobiya iska caabiyaan weerar ay Al-shabaab ka geystaan gudaha Soomaaliya sannadka 2021-ka, ka dib markii ay tiro ka mid ah weeraradaas ay ayaga la kulmeen sannadkii hore.
"Waxaan ku faraxsanahay in ciidamada Itoobiya ay ku guuleysteen in ay iska caabiyaan weerar Al-Shabaab ay ku soo qaadeen degmada Qansaxdheere ee gobolka Baay," ayuu yiri.
Wuxuu ku daray: "Ciidamada ayaa ku guuleystay in ay dilaan sagaal maleeshiyo ah. Tan iyo markii ay xaqiijiyeen goobta, waxaan shacabka ka codsanayaa in ay sii wadaan la shaqeynta laamaha amniga".
Gobolka Bay wuxuu kamid yahay meelaha ay Al-Shabaab sanadkan ka geysteen dhibaatooyinka ugu badan gaar ahaan go'doominta.
Al-Shabaab ayaa lumisay gacan ku haynta magaalooyin istiraatiiji ah oo ka tirsan Shabeellaha Hoose iyo Jubbada Dhexe, halkaasoo ay ku gacan-sareeyeen muddo badan kana soo saareen dhaqaale aad u baaxad weyn.
Dhinaca kale, sarkaal ka tirsan booliska ayaa saaka u sheegay warsidaha Garowe Online in qarax ka dhacay magaalada Muqdisho gudaheeda uu ka dhashay miino nooca dhulka lagu aaso oo ka dhacday waddada Madaxtooyadii Cabdiqaasim ee caasimadda. Taliye ku xigeenka milatariga ayaan ka badbaadey.
GAROWE ONLINE
