Cirro oo la kulmay Ra’iisul Wasaaraha Qatar

Doha, Qatar — Ra’iisul Wasaaraha Qatar, ahna Wasiirka Arrimaha Dibadda ee dalkaas, Sheikh Mohammed bin Abdulrahman bin Jassim Al-Thani, ayaa Maanta kulan muhiim ah la qaatay Madaxweynaha Somaliland, Abdirahman Maxamed Cabdillaahi Irro, oo booqasho ku jooga Doha.

Kulankan ayaa labada dhinac waxay kaga wada hadleen xaaladda siyaasadeed ee Somaliland iyo horumarka ugu dambeeyay ee ka socda, iyadoo si gaar ah diiradda loo saaray taageerada dadaallada lagu doonayo in dib loogu billaabo wadahadallada maamulka Hargeysa la lahaa dowladda Soomaaliya.

Ra’iisul Wasaaraha Qatar ayaa cadeeyay in dowladiisa ay aaminsan tahay in mustaqbalka Soomaaliya lagu dhisayo isfahan, wada hadal furan iyo iskaashi dhismeed oo dhammaan qaybaha dalka ay ka wada qeyb qaataan, si loo ixtiraamo madaxbannaanida iyo midnimada Qaranka Federaalka Soomaaliya.

Qatar ayaa kamid ah dalalka Khaliijka ee saameynta siyaadeed ku leh dalka Soomaaliya, waxaana door wayn ku lahayd doorashooyinkii ugu dambeeyay.

Somaliland oo xiriir dhaw oo ganacsi kala dhaxeeya Imaaraadka oo maalgashi ku sameeyay dekadda Berbera, ayaa joojisay wadahadalladii dowladda Soomaaliya kadib booqashadii uu Ra'iisul Wasaare Xamse ku tagey Laascaanood bishii April 2025.

GAROWE ONLINE