Cirro oo Mushahaarka u kordhiyay Ciidamada Somaliland

HAREYSA, Soomaaliya - Madaxweynaha maamulka Somaliland C/raxmaan Cirro ayaa ku dhawaaqday in ay kordhin doonto mushaarka ciidamada 50%, taasoo qayb ka ah ballanqaadkii uu sameeyay xilligiisa ololaha doorashadda.

Sida ku xusan war kasoo baxay xafiiska Madaxweynaha, kordhinta mushaarka ayaa la hirgelin doonaa sanadkan, iyadoo lagu daray miisaaniyadda 2025, iyadoo tani noqonayso markii ugu horreysay oo ballanqaad Madaxweyne lagu kordhiyo mushaarka ciidamada Somaliland.

Madaxweynaha Somaliland ayaa sheegay: “Waxaan soo saaray amar madaxweyne oo ah in mushaarka joogtada ah ee ciidammada la kordhiyo 50% sannadkan".

Sidoo kale, madaxweynaha ayaa soo saaray amar ku saabsan in la hirgeliyo nidaamka Diiwaangelinta Biometric-ka IRIS ee dhammaan ciidamada Somaliland. Diiwaangelinta ayaa la filayaa in ay bilaabato 1-da Febuary 2025, waxaana la doonayaa in la dhameystiro 30 maalmood gudahood.

Kordhinta mushaarku waxay dhaqan gal doontaa markii la dhameystiro nidaamka diiwaangelinta biometric iyo tirakoobka ciidamada, sida ku xusan amarka Madaxweynaha.

Madaxweyne Irro ayaa sidoo kale ballanqaaday in la hagaajin doono xirfadaha iyo awoodda ciidamada Somaliland, iyadoo dowladdiisu qorsheyneyso inay bixiso tababarro casri ah iyo qalab horumarsan si loo xoojiyo amniga Maamulka.

GAROWE ONLINE