Cirro: “Somaliland Waa Albaabka Mareykanku u Mari Karo La-dagaallanka Shiinaha iyo Argagixisada”

HARGEYSA — Madaxweynaha Somaliland, Cabdiraxmaan Maxamed Cabdillaahi (Cirro), ayaa sheegay in Somaliland ay diyaar u tahay inay noqoto “albaab istiraatiiji ah” oo uu Mareykanka uga hortagi karo saameynta sii kordheysa ee Shiinaha iyo khataraha argagixisada ee Geeska Afrika.

Madaxweyne Cirro ayaa hadalkan ku sheegay wareysi gaar ah oo uu siiyay Breitbart News, isagoo ku sugan magaalada Dubai kadib ka qeybgalka Madasha Maamul-wanaagga Adduunka (World Government Summit). Wuxuu xusay in xukuumaddiisu ay si firfircoon u dooneyso xiriir dhow oo ay la yeelato Washington, isaga oo ku tilmaamay Somaliland “abaal-marin istiraatiiji ah” oo Mareykanku ka faa’iidaysan karo.

Madaxweynaha ayaa carrabka ku adkeeyay in Somaliland ay tahay meel amni iyo deggenaansho leh marka loo eego dalal badan oo ku yaalla gobolka, taasoo uu sheegay inay ka dhigeyso lammaane lagu kalsoonaan karo. Wuxuu sidoo kale tilmaamay in Somaliland ay leedahay xeeb dhererkeedu gaarayo qiyaastii 850 kiiloomitir oo ku taalla marin-biyoodka istiraatiijiga ah ee Gacanka Cadmeed iyo Badda Cas, halkaas oo maraakiibta ganacsiga caalamiga ahi ay si joogto ah u maraan.

Dhanka kale, Madaxweyne Cirro ayaa sheegay in Somaliland ay hodan ku tahay kheyraad macdan oo muhiim ah, kuwaas oo uu ku tilmaamay inay fure u noqon karaan iskaashi dhaqaale oo ballaaran. Wuxuu intaas ku daray in wada shaqeyn dhex marta Somaliland iyo Mareykanka ay gacan ka geysan karto xakamaynta saameynta Shiinaha ee silsiladaha saadka muhiimka ah, xoojinta la-dagaallanka kooxaha xagjirka ah iyo sugidda amniga marin-biyoodka Badda Cas.

Ugu dambeyn, Madaxweynuhu wuxuu soo dhaweeyay aqoonsigii dhowaan ka yimid Israa’iil, isagoo sidoo kale taageeray dadaallada nabadeed ee uu hormuudka ka yahay Donald Trump. Hadalladiisa ayaa muujinaya jihada cusub ee Somaliland ay ku doonayso inay ku xoojiso xiriirkeeda quwadaha waaweyn, xilli tartan istiraatiiji ah uu ka socdo Geeska Afrika.

GAROWE ONLINE