Cod u qaadista mooshinka ka dhanka ah Jubaland oo dib loo dhigey
-
- Posted On 23-05-2015, 11:48AM
May 23, 2015 (GO)- Waxaa maanta baaqday fadhigii xildhibaannada baarlammaanka Dowladda Federaalku codka ugu qaadi lahaayeen mooshinka ka dhanka ah baarlamaanka Jubaland.
Sababta cod-u-qaadista mooshinku u baaqdey ayaa ah kadib markii uu soo buuxsami waayey kooramku.
Dhanka kale, Guddoomiyaha baarlammaanka Maxamed Sheekh Cismaaan Jawaari ayaa barlammaanka u akhriyey codsi ka yimid xukuumadda kaasoo lagu dalbanayey in muddo labo todobaad ah dib loo dhigo cod u qaadista mooshinka.
Xildibaannada mooshinka soo gudbiyey ayaa ku gacan sayrey codsigaas iyagoo ku adkeystey in la sii wado cod u qaadista mooshinka laga keenay baarlamaanka Jubaland.
Mooshinkan oo ah kii ugu horreeyey noociisa waxay xildhibaannada soo gudbiyey dalbanayaan in dib u eegis lagu sameeyo qaabka lagu soo xulay baarlamaanka Jubaland oo sida ay ku doodayaan ah mid aan waafaqsaneyn dastuurka federaalka.
GAROWE ONLINE
