Covid-19: Muqdisho oo laga helay kiis cusub; tirada guud oo gaartay 8

MUQDISHO, Soomaaliya - Wasaaradda Caafimaadka dowladda federaalka ah ee Soomaaliya ayaa ku dhawaaqdey in uu soo kordhay kiis cusub oo la xiriira fayruska dilaaga ah ee Corona.

War-saxaafadeed kasoo baxay wasaaradda ayaa lagu sheegay in ruuxaan uu yahay qof degaan ku ah Muqdisho isla markaana aanan ku imaan safar dibadda ah.

Tani ayaa tiradda guud ee kiiska ka dhigeysa sideed. Si lamid ah, marka laga hadlo qaabka uu ku qaadey ruuxaas oo ah in dalka lagu qaad siiyey, waa laba xaaladood.

"Waxaa soo kordhay xaaladii 8aad oo xanuunka COVID-19 lagu xaqiijiyey. Waa muwaadin Soomaaliyeed oo lab ah, da’diisuna tahay 58 sano, wuxuuna deegaan ku yahay Muqdisho oo safar kuma imaan. Tirada guud ee la xaqiijiyey: 8 Tirada bogsashada : 1 Tirada dhimashada : 0," ayaa lagu yiri bayaanka.

Dhawaqaan ayaa kusoo aadaya xili maanta ay wasaaradda ku dhawaaqdey in ay hirgelisay sheybaar lagu ogaado cudurka oo yaala Muqdisho isla markaana ay WHO aqoonsatay.

Ma cadda hadii bukaanka soo kordhay uu kamid yahay ku dhowaad 50 qof oo wasaaraddu baaritaan ku sameysay kadib markii ay la kulmeen qaar kamid ah shaqsiyaadkii horey loo xaqiijiyey.

Dadka uu soo ridanayo xanuunka safmareenka oo sii kordha ayaa xoojineysa walaaca dadweynaha ka muujinayo caabuqa, kaas oo guud ahaan caalamka ku dilay 70-kun; Afrikana 10-kun.

GAROWE ONLINE