Dad ku geeriyooday dagaal beeleed ka dhacay Muqdisho

MUQDISHO, Soomaaliya – Ugu yaraan tobban qof ayaa ku dhimatay, tirro kalana ay ku dhaawacmeen dagaal Sabtida maanta ah degmadda Kaaraan ee bariga Muqdisho ku dhexmaray ciidamo kawada tirsan milatariga Soomaaliya.

Warar is-khilaafsan ayaa kasoo baxay sababta keentay isku-dhaca; fahfaahinada qaar waxay ku sheegayaan in uu salka ku hayey aano qabiil, halka warbixino kale ay muujinayaan in ka dhashay is-qabqabsi dhul oo saraakiil u dhaxeeya.

Qof kamid ah dadka degaanka oo telefoonka ugu waramay warsidaha Garowe Online ayaa sheegay in askarta ay isku-adeegsadeen hubka noocyadiisa kala duwan isla markaana is-rasaaseynta ay socotay ku dhowaad hal saac.

"Dhulka la sheegay in ay isku hayaan saraakiisha wuxuu ku yaalaa aagagaarka mirinaayo ama meel u dhaw kawaanka Bari ee degmada Kaaraan," ayuu yiri qofkan codsaday in aan magaciisa loo adeegsan qalabka warbaahinta.

Maamulka degmadda iyo taliska milatariga Soomaaliya ayaan wali ka hadlin dhacdadan. Isku-dayo uu GO doonayey in uu ku gaaro ma aysan guuleysan.

"Inkasta oo dhimashada badkeedu tahay labada dhinac – askar – haddana waxaa ku jiray shacab gaar ahaan caruur la ii sheegay in ay kasoo laabteen goobaha waxbarashadda," ayuu hadalkiisa ku daray goobjooge la hadlay Garowe Online.

Isku-dhacan ayaa kusoo hagaagaya xilli xaaladda siyaasadeed ee waddanka aysan deganeyn isla markaana hubanti la’aan weyn ay ka jirto in waqtigeeda ku dhaceyso doorashooyinka heer Qaran ee loo balansan-yahay sanadka 2020-21.

GAROWE ONLINE