Dawladda Puntland oo adkaysay amaanka xeebaheeda

BOOSAASO - Ciidanka Ilaalada Badda Puntland (PMPF) ayaa gacanta ku dhigay dhowr doon oo ajnabi ah kuwaas oo lagu eedeeyay inay si sharci darro ah uga kalluumaysanayeen xeebaha Puntland, sida ay shaaciyeen mas’uuliyiinta Khamiistii.

Hawlgal socday muddo toddobaad ah ayaa lagu fuliyay si isku dubaridan, iyadoo laga sameeyay deegaanno badan oo xeebeed. Sida lagu sheegay war-saxaafadeed ka soo baxay Wasaaradda Maaliyadda Puntland, saddex ka mid ah doonyaha la qabtay waxaa iska lahaa muwaadiniin Yemeni ah, halka mid afaraadna ay lahaayeen dad u dhashay Iran. Waxaa sidoo kale la qabtay saddex doon oo kale oo taageero u ahaa kalluumaysiga sharci darrada ah.

Laba ka mid ah doonyaha laga leeyahay Yemen ayaa horay loo horgeeyay Maxkamadda Degmada Baargaal, taasoo ku ridday ganaaxyo iyo ciqaabo kale oo waafaqsan xeerarka Puntland ee la dagaallanka kalluumaysiga sharci darrada ah.

Halkaas waxaa sii dheer, hal doon oo Yemeni ah iyo saddex kale oo ay leeyihiin dadka reer Iran, oo wata 45 shaqaale ajaanib ah, ayaa loo wareejiyay magaalada Boosaaso, halkaas oo ay ka hor istaagi doonaan maxkamad si loo marsiiyo nidaamka sharciga.

Wasaaradda Maaliyadda iyo Ciidanka Canshuur-Ururinta Puntland ayaa si adag uga digay in ay tallaabo sharci ah ka qaadi doonaan cid kasta oo Soomaali ah ama ajanabi ah oo ku lug leh kalluumaysiga sharci darrada ah.

Maamulka Puntland ayaa sidoo kale uga digay cid kasta oo isku dayda inay ka hortagto ciidamada ama adeegsato maleeshiyaad hubeysan si ay u carqaladeeyaan howlaha badda, in lagu qaadi doono dacwad ciqaabeed sida waafaqsan xeerarka amniga iyo cadaaladda Puntland.

Kalluumaysiga sharci darrada ah ayaa weli ah halis weyn oo saameyn ku leh khayraadka badda Soomaaliya, isagoo ka dhigaya kalluumaysatada maxalliga ah iyo bulshooyinka xeebaha kuwo ku waaya fursado nololeed iyo dhaqaale.