Dib u dhac joogto ah oo soo wajahay doorashadda Muqdisho

MUQDISHO – Guddiga Madaxa Bannaan ee Doorashooyinka ayaa shaaciyey in doorashada golayaasha deegaanka ee gobolka Banaadir ay dhici doonto 25‑ka bisha soo socota, taasoo noqonaysa markii 3aad oo dib u dhac ku imaanayo waqtiga codbixinta.

Guddoomiyaha guddiga, Cabdikariim Axmed Xasan, ayaa wariyeyaasha Muqdisho u sheegay in shacabka Banaadir ay codkooda ku dhiiban doonaan habka “hal qof, hal cod” si ay u doortaan wakiilladooda golayaasha deegaanka.

“25‑ka bisha soo socota, gobolka Banaadir wuxuu aadi doonaa goobaha codbixinta si loo qabto doorasho hal qof, hal cod ah,” ayuu Cabdikariim ku yiri shir jaraa’id oo ka dhacay xarunta guddiga.

Xisbiyada siyaasadeed ee u tartamaya kuraasta ayaa bilaabay ololeyaal guud ahaan Muqdisho iyo gobolka Banaadir, iyagoo raadinaya taageerada shacabka ka hor maalinta codbixinta.

Hase yeeshee, waxaa jira khilaaf siyaasadeed oo ka taagan doorashada, iyadoo dowladda federaalka iyo qaar ka mid ah saamilayda siyaasadda aysan isku raacin nooca doorashada iyo wax ka bedelka qodobada qaar ee dastuurka.

Khilaafka ayaa laga cabsi qabaa inuu saameyn ku yeesho habsami u socodka doorashada, halka muwaadiniinta Muqdisho ay rajeynayaan in xal lagu heshiiyo si doorashadu u noqoto mid nabdoon oo dimuqraadi ah.

GAROWE ONLINE