Dowladda Soomaaliya oo beenisay hadal ka soo yeeray Hay’adda Duulista Somaliland

Maareeyaha duulista hawada Somaliland ayaa musuq ku eedeeyay dowladda.

Muqidsho, Soomaaliya - Hay’adda Duulista Rayidka Soomaaliyeed ayaa beenisay hadal maanta ka soo yeeray maareeyaha duulista hawada Somaliland Cumar Sayid Cabdillaahi.

Hay’adda Duulista Rayidka Soomaaliyeed oo warmurtiyeed soo saartay ayaa ku tiri: “Waxaan shacabka Soomaaliyeed ku wargelinaynaa in aysan waxba iska beddelin mid ahaanta iyo maamulka hawada Soomaaliya, ayna masuul ka tahay Dawladda Federaalka Soomaaliya.”

Warmurtiyeedka hay’adda ayaa lagu sheegay in ay leeyihin magac soo jireen ah isla markaana ay bixiyaan adeegyo ka mid ah kuwa ugu wanaagsan markii loo fiiriyo wadamada Caalamka.

“Diyaaradaha mara hawada dalkeenna waxay helaan mid ka mid ah adeegyada ugu badqabka sarreeya adduunka, taas oo keentay in hawada Soomaaliya si heer caalami ah loogu aqoonsado heerka ugu sarreeya ee “Class-A Airspace.” ayaa lagu yiri qoraalka hay’adda.

Maareeyaha duulista hawada Somaliland Cumar Sayid Cabdillaahi ayaa ku eedeeyay dowladda Soomaaliya in ay lunsatay lacag dhan 60 Milyan, isla markaana siyaasadeysay diyaraadaha Riyadka.

GAROWE ONLINE