Dowladda Soomaaliya oo beenisay in xiriir kala dhexeeyo Israel

MUQDISHO — Dowladda Soomaaliya ayaa si adag u beenisay warar dhawaan ka soo baxay mas’uuliyiin Israa’iil ah oo sheegayay in labada dhinac ay leeyihiin xiriir ama wadahadal siyaasadeed.

Wasiirka Xaaladaha Dibadda ee Soomaaliya, Cali Maxamed Cumar (Cali Balcad), ayaa warbaahinta u sheegay Khamiistii in aysan jirin wax xiriir ah oo ka dhexeeya Soomaaliya iyo Israel.

“Ma jiraan wax xiriir ah oo ka dhexeeya Soomaaliya iyo Israel, sidoo kalena mowqifka Soomaaliya ee siyaasadaha Israel ma isbeddelin,” ayuu yiri Wasiir Balcad, isagoo carrabka ku adkeeyay in dalku uusan lahayn xiriir diblomaasiyadeed ama siyaasadeed oo la leh Israel.

Hadalkan ayaa ku soo aaday kadib markii Wasiir ku xigeenka Arrimaha Dibadda ee Israa’iil, Sharren Haskel, uu Arbacadii sheegay in Israel ay lahayd “xiriir gaar ah” oo ay la leedahay dowladda Soomaaliya.

Wareysi uu siiyay i24NEWS, Haskel ayaa tilmaantay in wada-xaajoodka la sheegay uu la xiriiri karo walaacyada ay wadaagaan ee ku saabsan saameynta kooxda Houthis ee Geeska Afrika.

“Waxaan u arkaa in xaaladda halkaas ay halis tahay, waxayna saameyn ku yeelan doontaa adduunka intiisa kale,” ayay tiri Haskel, iyadoo xustay saameynta suurtagalka ah ee waddooyinka badda, kalluumaysiga iyo ganacsiga caalamiga ah ee ka gudba gobolka.

Soomaaliya iyo Israel ma laha xiriir diblomaasiyadeed. Soomaaliya waa dal Muslim ah isla markaana xubin ka ah Ururka Carabta.

Bishii hore, warbixin uu soo saaray Qaramada Midoobay ayaa tilmaantay waxa ay ugu yeertay “xiriir horumaraya” oo u dhexeeya dhaqdhaqaaqa Houthis ee Yemen iyo kooxda Al-Shabaab ee Soomaaliya, taasoo kor u qaaday walaaca amni ee gobolka iyo midka caalamiga ah.

Soomaaliya ayaa si joogto ah u sheegtay in aysan waligeed lahayn xiriir diblomaasiyadeed oo la leh Israel isla markaana marar badan ku celisay taageerada aan shuruud laheyn ee ay u hayso dadka Falastiin.

GAROWE ONLINE