Dowladda Soomaaliya oo Si Adag U Cambaareysay Hadalka Netanyahu

MUQDISHO – Dowladda Soomaaliya ayaa si adag u cambaareysay hadalka Raisul Wasaare Netanyahu ee ku saabsan in dhulka Sacuudiga loo isticmaali karo in lagu dhiso dowlad Falastiin, iyagoo ku tilmaamay hadalladaas "khalad xadgudub ah oo ka dhan ah sharciga caalamiga ah."

Warsaxafadeed ay soo saartay Wasaaradda Arrimaha Dibadda ee Soomaaliya Axaddii, masuuliyiinta ayaa sheegay in erayada Netanyahu ay yihiin xadgudub ku ah Axdiga Qaramada Midoobay iyo tacaddi ku saabsan madax-bannaanida Sacuudiga.

"Xaaladdan, Soomaaliya waxay mar kale muujineysaa taageerada buuxda ee ay u hayso Boqortooyada Sacuudiga waxayna ku adkaynaysaa ahmiyadda ay leedahay ilaalinta madax-bannaanida, xasilloonida, iyo ixtiraamka sharciyada caalamiga ah," ayaa lagu yiri warsaxafadeedka.

Dowladda Soomaaliya ayaa sidoo kale caddeysay taageerada adag ee ay u hayso arrimaha Falastiin, iyadoo taageertay dhismaha dowlad madax-bannaan oo Falastiin ah, oo ay caasimaddeedu tahay Bariga Qudus, sida ku xusan qaab-dhismeedka sharciga caalamiga ah. Soomaaliya ayaa ka hor timid dhammaan qorshayaasha lagu doonayo in lagu qasbo dadka Falastiiniyiinta ah inay ka barakacaan dhulkooda, iyadoo sheegtay in ficilada noocaan oo kale ah ay yihiin xadgudubyo weyn oo ka dhan ah sharciga caalamiga ah ee xuquuqda aadanaha.

"Somaliya waxay si cad uga soo horjeedaa dhammaan qorshayaasha iyo fikradaha lagu doonayo in lagu qasbo shacabka Falastiiniyiinta. Ficiladan waxay burburinayaan dadaallada socda ee lagu doonayo in lagu gaaro nabad xaq ah iyo mid waarta gobolka," ayaa lagu yiri warsaxafadeedka.

Cambaareyntan waxay la jaanqaadaysaa jawaabta Sacuudiga, kaasoo Wasaaradda Arrimaha Dibadda ee Sacuudiga ay ku eedeysay Netanyahu inuu isku dayay "in uu iska indha-tiro" waxa ay ku tilmaameen "falalka Israa’iil ee sii socda" ee ka dhacay Gaza, oo ay ku jiraan eedeymo ku saabsan nadiifinta qowmiyadeed.

"Boqortooyada Sacuudiga waxay xaqiijinaysaa in shacabka Falastiiniyiinta ay xaq u leeyihiin dhulkooda, ma aha kuwo soo galaya ama soo duulaya oo la eryi karo marka ay rabto colaad Israa’iil," ayaa lagu yiri hadalka Wasaaradda Arrimaha Dibadda ee Sacuudiga.

Dhawaan, wadamo kale oo Carbeed oo ay ka mid yihiin Qadar, Urdun, Masar, Isutagga Imaaraatka Carabta, Kuweit iyo Ciraaq, iyo sidoo kale Golaha Iskaashiga Khaliijka ee GCC ayaa sidoo kale si xooggan u cambaareeyay wicitaanka Netanyahu ee ku saabsan dhisidda dowlad Falastiin ah oo ku taal Sacuudiga.

GAROWE ONLINE