Duqa cusub ee Garowe oo sheegay inuu horumarinayo caasimadda
-
- Posted On 08-06-2015, 04:21PM
June 8, 2015 (GO)- Duqa cusub ee degmada Garowe ayaa ballan qaaday inuu dadaal badan ku bixin doono horumarinta caasimadda Puntland ee Garowe.
Axmed Siciid Geelle (Shoodhe) oo ka hadlayey munaasabad uu xilka kula wareegayey oo isla maanta ka dhacday xarunta hay'adda PDRC ayaa sheegay inuu xoogga saari doono xoojinta ammaanka iyo kor u qaadista bilicda magaalada.
"waxaan waqti badan iyo maskax iyo dadaalba gelinayaa sidii aan usii horumarin lahaa caasimadda Puntland ee Garowe...waxan xoogga saarayaa dhinacyada ammaanka iyo nadaafadda" ayuu yiri.
Dhanka kale, Shoodhe wuxuu ka codsaday qaybaha kala duwan ee bulshada inay si dhow ula shaqeeyaan isagoo wacad ku maray inuu qaadan doono dhammaan talooyinka uga yimaada dhanka dadweynaha.
June 3, 2015 ayey ahayd markii Madaxweynaha Puntland Cabdiweli Maxamed Cali Gaas kala direy golihii deegaanka ee Garowe islamarkaana xilka ka qaadey duqii hore ee Garowe isagoo xilkaas usoo magacaabay Axmed Siciid Geelle (Shoodhe).
GAROWE ONLINE
