Qaahira, Masar — Madaxweynaha Masar Abdel Fattah el-Sisi ayaa sheegay in dalkiisu si buuxda u taageerayo dadaallada lagu xaqiijinayo amniga iyo xasilloonida Soomaaliya, isagoo si adag uga soo horjeestay tallaabo kasta oo wax u dhimaysa madaxbannaanida, midnimada iyo wadajirka dhuleed ee Soomaaliya.

El-Sisi ayaa hadalkan sheegay Axaddii, intii uu kulan la lahaa Agaasimaha CIA-da Mareykanka John Ratcliffe. Kulanka waxaa sidoo kale ka qeyb galay Madaxa Hay’adda Sirdoonka Guud ee Masar, Hassan Rashad, waxaana looga hadlay xiriirka istiraatiijiga ah ee labada dal iyo xaaladaha gobolka, oo ay ka mid yihiin dagaalka Iran, qorshaha xabbad-joojinta Gaza, arrinta Falastiin iyo xiisadda Suudaan.

Ratcliffe ayaa dhankiisa muujiyay sida Mareykanku u qadarinayo doorka firfircoon ee Masar ay ka qaadanayso taageerada amniga iyo xasilloonida Afrika. Waxa uu carrabka ku adkeeyay muhiimadda ay leedahay in labada dal ay sii wadaan wada shaqeynta, gaar ahaan arrimaha Suudaan, Soomaaliya iyo Geeska Afrika, iyo amniga maraakiibta caalamiga ah.

Mowqifka El-Sisi ayaa qeyb ka ah taageero joogto ah oo Masar ay u muujinayso madaxbannaanida iyo wadajirka dhuleed ee Soomaaliya. Soomaaliya iyo Masar ayaa xiriirkooda u qaaday heer iskaashi istiraatiiji ah sanadkii 2025, iyadoo labada dhinac ay sidoo kale kala saxiixdeen heshiis difaac iyo hab-maamuus iskaashi milatari.

Masar ayaa sidoo kale ballanqaadday inay ciidamo u diri doonto howlgalka Midowga Afrika ee Taageerada iyo Xasilinta Soomaaliya (AUSSOM), iyadoo dowladda Masar ay sheegtay in ciidamadeeda lagu howlgeli doono gobolka Shabeellaha Dhexe. Labada dal ayaa sidoo kale ballaariyay iskaashigooda dhinacyada ganacsiga, garsoorka iyo maaraynta kheyraadka biyaha.

Kulanka ayaa ku soo beegmaya xilli Masar iyo Itoobiya ay weli isku khilaafsan yihiin arrimo la xiriira Biyo-xireenka Wabiga Nile, halka Soomaaliya ay muhiimad sii kordheysa ku leedahay amniga Geeska Afrika iyo Badda Cas. Isku soo dhowaanshaha danaha Qaahira iyo Washington ee amniga Soomaaliya iyo maraakiibta caalamiga ah ayaa sidoo kale xoojinaya muhiimadda istiraatiijiga ah ee gobolka.

GAROWE ONLINE