Fahfaahin: Hoobiyaal lagu garacay degmooyin ka tirsan Muqdisho 

Muqdisho – Wararka ka imaanaya magaalada Muqdisho ayaa sheegaya in hoobiyaal lagu riday Xamarjajab, Xamarweyne iyo Shibis, iyadoo weerarkaasi uu sababay dhimashada canug yar oo ku socday dugsi, iyo dhaawaca saddex qof oo kale oo rayid ah. Dadka dhaawacmay waxay ku jiraan xaalad adag oo caafimaad, waxaana sidoo kale dhaawaca ku jira qof aan weli la aqoonsan.

Weerarkaas ayaa dhacay xili uu socda diiwaangelinta dadweynaha ee loogu diyaar garoobayo doorashada golaha deegaanka ee bisha Juun. Waxa kale oo la sheegay in hoobiyaashan la soo riday xilligan oo muhiim u ah diyaar garowga doorashooyinka, taasoo saameyn ku yeelatay amniga iyo nabadgelyada guud ee magaalada.

Inkasta oo aan wali si rasmi ah loo oga cida ka dambeysa weerarka, haddana waxaa muddooyinkii dambe soo kordhayay weerar hoobiyaal ah oo ka dhacay Muqdisho, taasoo muujinaysa in amniga magaalada uu wali yahay mid aad u khatar ah, iyadoo dadweynaha caadiga ah ay marar badan ku dhibtoonayaan weeraradan aan la garanayn cidda ka dambeysa.

Goobaha uu hoobiyaha ku dhacay waxay ku yaallaan meel u dhow xarumaha muhiimka ah ee magaalada, taasoo ka dhigaysa weeraradan kuwo saameyn ku yeelanaya bulshooyinka ku nool magaalada. Waxaa la tilmaamay in hoobiyaasha ay dhiibaato ku hayaan dadka magaalada ku nool, iyadoo diiwaangelinta doorashada ay ka mid tahay arrimaha ugu muhiimsan ee ay haatan ka shaqeynayaan dowladda iyo Maamulka G/Banaadir.

Maamulka Muqdisho iyo ciidamada ammaanka ayaa ku howlan baaritaanka iyo xaqiijinta xaalada, balse dadka deegaanka ayaa walaac ka muujiyay xaaladda amni ee hadda ka jirta magaalada, iyagoo ku baaqaya in la xoojiyo ammaanka si loo xaqiijiyo in dadku si ammaan ah ugu diyaar garoobaan doorashada.

GAROWE ONLINE