Fiqi oo ka digay qorshaha Israel ee dalka Soomaaliya 

MUQDISHO – Wasiirka Gaashaandhigga Soomaaliya ayaa sheegay in dawladdu ay hayso "xog sugan" oo ku saabsan qorshe ay Israa'iil ku doonayso inay Falastiiniyiinta reer Gaza si qasab ah ugu soo wareejiso dhulka Soomaaliya, isagoo ku thabay in Muqdisho aysan marnaba oggolaan doonin falkaas.

Wasiirka Gaashaandhigga, Axmed Macallin Fiqi, oo u warramay telefishinka Al Jazeera Mubasher, ayaa sheegay in dawladda federaalku ay "daawan doonin" haddii lagu xadgudbo madax-bannaanida dalka. Wuxuu ku tilmaamay qorshahan la sheegay inuu yahay khatar si toos ah ugu socota midnimada dhuleed ee qaranka Soomaaliyeed.

"Waxaan haynaa xog xaqiiqo ah oo ku saabsan qorshe Falastiiniyiinta loogu soo rarayo ciidda Soomaaliya," ayuu yiri wasiir Fiqi. Inkastoo uusan bixin faahfaahin dheeraad ah oo ku saabsan isha xogtaas, haddana hadalkiisu wuxuu ku soo aadayaa xilli xasarado dibloomaasiyadeed ay ka jiraan Geeska Afrika.

Hadalka wasiirka ayaa daba socda xiisad ka dhalatay go’aankii Israa’iil ay 26-kii Diseembar ku aqoonsatay madax-bannaanida Somaliland, taas oo Muqdisho ay u aragto qayb ka mid ah dhulkeeda. Wasiir Fiqi ayaa aqoonsigaas ku tilmaamay "xadgudub weyn" oo ka dhan ah qaranimada Soomaaliya.

Madaxweyne Xasan Sheekh Maxamuud iyo mas'uuliyiin kale oo sarsare ayaa horay u cambaareeyay tallaabadan, iyagoo ku dooday in aqoonsiga Somaliland uu xiriir la leeyahay qorsheyaal ballaaran oo gobolka laga damacsan yahay iyo raridda dad dadka rayidka ah. Dawladda Soomaaliya ayaa hadda wada olole dibloomaasiyadeed oo ay taageero uga raadinayso saaxiibada Afrika iyo Carabta si loo difaaco madax-bannaanida dalka.

In kasta oo mas'uuliyiinta Israa'iil aysan si rasmi ah u xaqiijin qorshaha raridda Falastiiniyiinta ee Soomaaliya, haddana sheegashada wasiirka ayaa dhalisay falcelin xooggan oo ka timid Midowga Afrika iyo Jaamacadda Carabta, kuwaas oo dhammaantood ku celiyay inay taageersan yihiin madax-bannaanida iyo midnimada Soomaaliya.

GAROWE ONLINE