Furitaanka Baarlamaanka oo Dib u Dhacay Xili ay Taagan Yihiin Muran Siyaasadeed iyo Khilaaf Doorasho

MUQDISHO, Soomaaliya – Fadhigii furitaanka Baarlamaanka Federaalka Soomaaliya oo lagu waday inuu qabsoomo maanta (Sabti) ayaa dib u dhacay, kaddib isbeddelo daqiiqaddii ugu dambeysay oo uu sameeyay Madaxweynaha Soomaaliya, Xasan Sheekh Maxamuud, kaasoo wajahaya cadaadis siyaasadeed gudaha dalka.

Fadhiga 7-aad ee Baarlamaanka ayaa hadda lagu wadaa inuu furmo 29-ka bishan Sebteembar, sida ay shaaciyeen madaxda labada aqal ee Baarlamaanka, kuwaas oo farriimo danbe u diray xildhibaannada.

Dastuurka dalka, gaar ahaan Qodobka 90-aad, ayaa faraya in Madaxweynaha Jamhuuriyadda uu si rasmi ah u furo kalfadhiyada Baarlamaanka, isla markaana uu khudbad uga jeediyo xildhibaannada arrimaha dowladda — taasoo qeyb ka ah dhaqanka dowladaha xubnaha ka ah Commonwealth-ka.

Dib u dhaca furitaanka kalfadhiga Baarlamaanka ayaa yimid iyadoo magaalada Muqdisho ay ka jiraan saadaal siyaasadeed oo xooggan, oo tilmaamaysa in xildhibaano qaar ay diyaarinayaan mooshin ka dhan ah Ra’iisul Wasaare Xamse Cabdi Barre.

Ra’iisul Wasaare Xamse ayaa meesha ka saaray in uu u tartami doono xilka Madaxweynaha, isagoo sheegay in uu weli xiriir wanaagsan kala dhaxeeyo Madaxweyne Xasan Sheekh. Labadooda lama arag iyagoo si toos ah u loolamaya ama khilaaf siyaasadeed dhex maray tan iyo markii ay wada shaqeynayeen saddexdii sano ee la soo dhaafay.

Kalfadhigan ayaa kusoo beegmaya xilli ay taagan yihiin khilaafaad siyaasadeed oo ku saabsan isbeddel lagu sameeyay sharciga doorashooyinka dalka, kaasoo dhigaya in dalka laga hirgeliyo doorasho qof iyo cod ah. Qorshahan ayaa waxaa si weyn uga soo horjeestay maamulada Puntland iyo Jubbaland iyo siyaasiyiin kale.

Madaxweyne Xasan Sheekh ayaa ku adkeystay in Soomaaliya aysan u dulqaadan karin in la beddelo nidaamka doorashada cusub, isagoo sheegay in isbeddelkaas uu dhaawici doono dimuqraadiyadda dalka. Hase yeeshee madaxda mucaaradka ah ayaa doonaya in la adeegsado nidaamkii hore ee wax lagu dooran jiray doorashada 2026.

GAROWE ONLINE