Gedo: sarkaal ka tirsanaa Al-shabaab oo duqeyn lagu diley
-
- Posted On 12-03-2015, 04:38PM
March 12, 2015 (GO)- Sarkaal ka tirsanaa hoggaanka Al-shabaab oo lagu magacaabi jirey Aadan Garaar ayaa lagu diley duqeyn dhanka cirka ah oo galabta ka dhacdey duleedka degmada Baardheere ee gobolka Gedo.
Gaari yar oo sarkaalkaas iyo nin kale la socdeen ayaa diyaarad nooca bilaa duuliyaha ahi dhowr gantaal la heshay xilli uu marayey deegaanka Aqabuul oo qiyaastii 40km degmada Baardheere dhanka bariga kaga beegan.
Sarkaalka duqeynta lugu diley ayaa ka tirsanaa qaybta amniyaadka ee Al-shabaab, wuxuuna kamid ahaa xubnaha ugu firfircoon.
Dowlada Maraykanka ayaa bilihii u dambeeyey kordhisey duqeymaha ay ka geysaneyso dalka Soomaaliya.
September 1, 2014 duqeyn Maraykanku ka geystey deegaanka Haawaay oo ka tirsan gobolka Shabeelada Hoose, waxaa lagu diley hoggaamiyihii hore ee Al-shabab Axmed Cabdi Godane.
December 29, 2014 duqeyn kale oo diyaaradaha Maraykanku ka fuliyeen deegaanka Saakow ee gobolka Jubbada Dhexe, waxaa lagu diley labo sarkaal oo ka tirsanaa hoggaanka ururka Al-shabaab. Labada nin midkood waxaa lagu magacaabi jirey Cabdinaasir Xasan Barakow Tahliil.
Jan 31, 2015 duqeyn ka dhacday deegaan dhanka bariga kaga beegan degmada Diinsoor ee gobolka Bay waxaa lagu diley sarkaal ka tirsanaa Al-shabaab oo lagu magacaabi jirey Yuusuf Dheeg. Ninkaasi sida la sheegay wuxuu ahaa madaxa sirdoonka iyo hawlgallada gudaha ee Al-shabab.
Dowladda Federaalka ayaa dhowaan shaacisey in ay markii ugu horreysey adeegsan doonto diyaaradaha aan duuliyaha lahayn si ay ula dagaalanto Al-shabaab.
GAROWE ONLINE
