Gollaha Wasiirada oo xilkii ka qaaday Mustaf Dhuxulow, magacaabayna agaasime cusub

MUQDISHO — Golaha Wasiirada ee Xukuumadda Federaalka Soomaaliya ayaa kulan deg-deg ah oo ay Isniintii maanta ku yeesheen magaalada Muqdisho, waxay xilkii kaga qaadeen Agaasimihii Guud ee Hey’adda Socdaalka iyo Jinsiyadda Soomaaliya, Mustaf Sheekh Cali Dhuxulow.

Kulankan oo uu shir guddoominayay Ra'iisul Wasaare Xamsa Cabdi Barre, ayaa lagu ansixiyay magacaabista Agaasimaha cusub ee hey’addaas, kaas oo loo magacaabay Xildhibaan Xuseen Qaasim Yuusuf, oo loogu yeero (Idow).

Mustaf ayaa xafiiska joogay 15 bilood iyo 7 maalin kaliya, waxaana la sheegay in mucaaradka u janjeero, oo markii horeba laga soo saaray.

Idow ayaa ka mid ahaa xildhibaannada baarlamaanka Soomaaliya ee sida weyn ugu lugta lahaa geedi-socodka wax-ka-beddelka dastuurka, oo muddooyinkii u dambeeyay dhaliyay muran xooggan iyo kala aragti duwanaansho dhanka siyaasadda ah.

Tallaabadan xil ka qaadista iyo magacaabista isugu jirta ayaa qayb ka ah isbeddellada ay xukuumaddu ku samaynayso hay’adaha muhiimka ah ee dowladda, xilli dalku uu marayo marxalad xasaasi ah oo dhanka dastuurka iyo amniga ah.

GAROWE ONLINE