Hadliye "ciidamada Kenya waxay Soomaaliya ka baxayaan 2017-ka"
-
- Posted On 11-04-2015, 10:20AM
April 11, 2015 (GO)- Dowladda Federaalka Soomaaliya ayaa shaacisey waqtiga ay ciidamada Kenya sida rasmiga ah uga bixi doonaan gudaha dalka Soomaaliya.
Wasiirka Arrimaha Dibadda Somalia, Cabdisalaan Hadliye Cumar ayaa sheegay in militeriga Kenya ka bixi doonaan Soomaaliya marka la gaaro sanadka 2017.
Wuxuu sidoo kale sheegay in qorshaha bixitaanka ciidamada Kenya yahay mid ay si wadajir ah u saxiixeen Dowladda Federaalka Somaliya, Kenya iyo Midowga Yurub.
"ciidanka Kenya waxan rajeynaynaa inay dalka ka baxaan sanadka 2017...waxaana socda qorshe dib loogu dhisayo ciidamada Soomaaliya, si ay amniga guud ee dalka ula wareegaan" ayuu yiri.
October 2011 ayey ciidamada Kenya soo galeen Soomaalia, waxayna si rasmi ah ugu biireen hawlgalka nabad ilaalinta Midowga Afrika ee AMISOM bishii June ee sanadkii 2012.
Kenya ayaa soo gelitaaka ciidankeeda ee Soomaaliya ku sababeysey inay tahay si ay ula dagaallamaan Al-shabaab oo khatar ku ah dhaqaalaheeda iyo weliba ammaanka muwaadiniinteeda, waa sida Kenya hadalka u dhigtaye.
Al-shabaab ayaa ugu hanjabtey Kenya inay sii wadi doonto weerarrada ay ka geysaneyso dalkaas haddii ay dib ula soo bixi weydo ciidamada ka jooga Soomaaliya.
Mucaaradka Kenya ayaa sidoo kale marar badan ku baaqey in dib loo soo saaro ciidamada Kenya ee jooga Soomaaliya.
GAROWE ONLINE
