Hiiraan: ciidamada DF iyo AMISOM oo deegaano ka qabsaday Al-shabab
-
- Posted On 04-08-2015, 08:57AM
August 4, 2015 (GO)- Ciidamada Dowladda Federaalka oo kaashanaya kuwa AMISOM ayaa gelinkii dambe ee shalay xoog kula wareegey deegaannada Ceel Dheer iyo Ceel Cali oo ku yaal galbeedka gobolka Hiraan.
Labadan tuulo waxaa in muddo ah gacanta ku hayey Ururka Al-shabaab, waxaana lagu soo warramayaa in dagaal khasaare geystey halkaas ku dhex maray ciidamada huwanta iyo Al-shabaab.
Guddoomiye Ku-xigeenka Gobolka Hiiraan Maxamed Ibraahim Cabdullaahi ayaa warbaahinta u xaqiijiyey in ciidamada huwantu xilligan si buuxda deegaanadaas gacanta ugu hayaan.
“Ciidamadu waxay 24tii saac ee la soo dhaafay la wareegeen deegaano ku yaal galbeedka Hiiraan...waxaa naga go'an sidii aan Al-shabaab uga sifeyn lahayn guud ahaan gobolka Hiiraan" ayuu yiri.
Al-shabaab ayaa weli ka arrimisa deegmooyin dhowr ah oo ku yaal gobollada dhexe ee Soomaaliya, gaar ahaan gobolka Hiiraan.
GAROWE ONLINE
