Horjooge Al-Shabaab u qaabilsanaa qorsheynta weerarada oo la dilay

Duqeyntan ayaa diyaaradaha aan duuliyaha lahayn ee Mareykanka ka fuliyeen gobolka Jubadda Dhexe.

MUQDISHO, Soomaaliya - Horjooge sare oo ka tirsan Al-Shabaab oo ku lug lahaa abaabulka weerarrada ayaa duqeyn ay fuliyeen lala beegsaday diyaaradaha aan duuliyaha lahayn ee Mareykanka.

Dowladda Soomaaliya ayaa sidaas sheegtay in howlgalkan uu ka dhacay gobolka Jubbada Dhexe, Axaddii. Balse ma aysan shaacin magaciisa iyo khasaaraha kale ee howlgalka.

Wakaaladda wararka qaranka Soomaaliyeed ee SONNA ayaa shaaca ka dhigtay in duqeyntan ay "iska kaashadeen ciidamadda xoogga dalka iyo saaxiibadda kale ee caalamka".

"Waa tallaabo kale oo DFS oo kaashaneysa Mareykanka ay qaadeen dhabar jabinta Khawaarijta naf lacaariga ah ee khatarta ku ah nabadda iyo horumarka shacabka Soomaaliyeed iyo kuwa gobolka intaba," ayay raacisay.

Qoraalka ayaa intaas ku daray: "Dowladda Federaalka Soomaaliya oo taageero ka helaysa dadkeeda iyo saaxiibada caalamiga ah waxaa ka go'an ay xididada u siibka horjoogayaasha iyo maleeshiyaadka Khawaarijta Al Shabab si loo gaaro Soomaaliya nabad ah oo xasiloon , lagana suuliyay argagixisada".

Dhinaca kale, Guutada 24aad ee Khaalid binu waliid ayaa howlgallo ka sameeyay goobo Al-Shabaab ku dhuumaaleysaneysay sida degaanada Gacal Ugaas iyo Murcudka oo hoos taga degmada Ruun-nirgood ee gobolka Shabeelada dhexe.

"Guutada 24aad ayaa dhanka kale qarxisay miinooyin dhagar qabayaashu ku aaseen waddooyin shacabku isticmaalo," ayaa lagu yiri qoraal ay baahisay Warbaahinta ku hadasha Afka Ciidamadda.

GAROWE ONLINE