Horjoogeyaal ka tirsan "AS" oo lagu dilay magaalada Buq-aqable
-
GAROWE ONLINE XAFIISKA MUQDISHO
- Posted On 31-01-2024, 01:52PM
Buq-aqable, Soomaaliya - Hay'adda Sirdoonka iyo Nabadsugida Qaranka ee NISA oo kaashanaysa Saaxiibada Caalamka ayaa magaalada Buq-aqable ee Gobolka Hiiraan ka fulisay hawlgal lagu dilay Horjoogeyaal ka tirsanaa “AS’.
Xubnahan ayaa la beegsaday ka dib markii ay tababar ku dhammaysteen magaalada Buq-aqable.
Hay’adda NISA ayaa warmurtiyeed ay soo saartay ku sheegtay in hawlgalkan oo la fuliyay 28-kii bishan Janaayo ayaa lagu dilay horjoogeyaal muddo lagu raad joogay.
Warmurtiyeedka ayaa lagu sheegay: “Hay'adda Sirdoonka iyo Nabadsugidda Qaranka waxaa markasta ka go'an in ay meel kasta ku beegsato cadawga Khawaarijta ah ee ku hawlan dhibaateynta shacabka Soomaaliyeed.”
Waxaa ka mid ahaa hogaamiyayaashii la dilay:
1- Cismaan Cali Cabdi (Caanooy) oo “AS” u qaabilsanaa Maaliyadda Degmada Jalalaqsi.
2- Buulle Kabey oo “AS” u qaabilsanaa Gaadiidka Gobolka Shabeellaha Dhexe.
3- Maxamed Abuukar oo “AS” u qaabilsanaa Maaliyadda magaalada Ceel-Cali Gobolka Hiiraan.
4-Cabdisalaan oo “AS” u qaabilsanaa Maaliyadda Gobolka Shabeellaha Dhexe.
5- Macalin Yaasir oo sidoo kale loogu yeero Saabir oo boono-jare ka ahaa Isbaaro AS u taala magaalada Shaw ee Gobolka Hiiraan.
6- Macalin Aadan Fanax waxa uu ahaa xubin ka tirsan qaybaha maaliyadda ee ‘AS’.
GAROWE ONLINE
