ICJ oo diidey dalabkii Kenya ee dacwadda Badda
-
WARIYAHA MUQDISHO GAROWE ONLINE
- Posted On 13-02-2021, 01:01PM
MUQDISHO, Soomaaliya - Maxkamadda Cadaaladda Aduunka ee ICJ ayaa ku gacanseyrtay dalabkii Kenya ee ku aadanaa in markii afaraad dib loo dhigo dacwadda badda ee kala dhaxeysa dalka Soomaaliya.
Sidda ku xusan qoraal kasoo baxay xeer-beegtadan hoostagta Jamciyada Qurumaha Ka Dhaxeysa, darafyadda waa in ay soo xaadiraan dood-afeedka loo balansan yahay 15-ka Maaj illaa 19-ka isla bishaas.
Dowladda federaalka Soomaaliya ee muddo xileedkeeda dastuuriga ah uu dhamaadey oo todobaadkii hore si adag uga hor-timid codsiga xukuumadda Nairobi ayaa soo dhaweysay go'aanka maxkamada.
Sii-haayaha Ra'iisul Wasaare ku xigeenka, Mahdi Maxamed Guuleed [Khadar] oo ku hadlay afka xukuumadda dhacdey, ayaa rajeeyay in dalka uu "xaq iyo cadaalad ku helo" labinta iyo guud ahaan "doodeena".
Xilli uu xusay in Soomaaliya "ay ku kalsoon tahay dhexdhexaadnimadda Maxkamadda Cadaaladda Aduunka," Mahdi ayaa ka codsaday shacabka "in ay noosoo duceeyaan in aan ku guuleysano dacwada".
"Waxaan leeyahay dhamaanteen haddaan nahay Soomaali guul baa inoo rajeynayaa, waanu ku han-weynahay Insha Allaahu in cadaalad xaq ay ku dhamaan doonto dacwadda," ayuu kusoo afmeeray hadalka.
Dowladda Kenya ayaan wali ka falcelin go'aanka Maxkamadda ICJ oo soo baxay shalay oo Jimco ahayd isla markaana Sabtida maanta ah si rasmi ah loogu wargeliyey dhinacyada ay khuseysa ee labada waddan.
GAROWE ONLINE
