IGAD oo ka hadashay khilaafka Galmudug iyo Ahlusunna [Dhagayso]
-
- Posted On 19-09-2015, 06:35PM
19 September, 2015(GO)-Wakiilka urur goboleedka IGAD ee arrimaha Somalia Maxamed Cabdi Afey oo waraysi siinayay Idaacadda BBC-da ayaa ka hadlay khilaafka u dhaxeeya maamulka Galmudug iyo Ahlusunna Waljameeca.
Afeey oo cambaareeyay colaadda dhextaalla labada dhinac ayaa sheegay inaysan danta Somaliyeed ku jirin dil balse loo baahanyahay in la soo afjaro wixii khilaaf ah.
Dhinacyada dagaalamay ayuu wakiilku ugu baaqay wada-hadal iyo isfaham si looga gudbo marxaladda haatan lagu jiro.
“Urur goboleedka IGAD aad ayuu uga xun yahay in dad Somaliyeed ay si nasiib daro ah ku dhintaan, waxaan ka xunnahay in dadka gobolada dhexe ku nool lagu dul dagaalamo, dagaal waa laga tagay oo dowladdnimo ayaa la qaatay" ayuu yiri Afeey.
Hadalka IGAD ka soo baxay ayaa imaanaya, xilli khilaaf dhimasho sababay uu u dhaxeeyo maamulka Galmudug iyo Ahlusunna Waljameeca.
GAROWE ONLINE
