IGAD Oo War Kasoo Saartay Fashilka Wadahadalka Khilaafka Doorashadda Soomaaliya

MUQDISHO, Soomaaliya — Urur-goboleedka IGAD ayaa ugu baaqay madaxda iyo siyaasiyiinta Soomaalida inay sii wadaan wada-hadallada siyaasadeed, kadib markii ay burbureen wadatashiyo maalmo ka socday Muqdisho oo u dhexeeyay dowladda federaalka iyo mucaaradka.

IGAD ayaa bayaan ay soo saartay ku sheegtay in sii socoshada wada-xaajoodka siyaasadeed ay muhiim u tahay ilaalinta xasilloonida dalka, xoojinta dowlad-dhiska iyo horumarinta nidaamka dimuqraadiyadda Soomaaliya.

Ururka ayaa dhinacyada siyaasadda isku haya ku boorriyay inay gaaraan heshiis loo dhan yahay oo ku saabsan arrimaha doorashooyinka iyo kala-guurka siyaasadeed ee dalka.

Sidoo kale, Midowga Afrika iyo Qaramada Midoobey ayaa iyaguna ugu baaqay siyaasiyiinta Soomaalida inay muujiyaan tanaasul siyaasadeed isla markaana ay gaaraan is-afgarad lagu xallinayo khilaafaadka taagan.

Beesha caalamka ayaa muujisay walaac ku saabsan xaaladda siyaasadeed ee Soomaaliya, iyadoo sheegtay in dalka uu galay marxalad kala-guur ah oo u baahan wada-shaqeyn siyaasadeed iyo hannaan loo dhan yahay si looga fogaado xasillooni darro horleh.

GAROWE ONLINE