Jaamacada Carabta oo baaq u dirtay madaxda Soomaalida
-
WARIYAHA QAAHIRA GAROWE ONLINE
- Posted On 13-02-2021, 05:23AM
QAAHIRA, Masar - Ururka Jaamacadda Carabta oo sheegay in uu si dhow ula socd is-mar-waaga doorashooyinka Soomaaliya ayaa wadahadal deg-deg ah ugu baaqay hogaamiyeyaasha Soomaalida.
Sidda ku xusan war-saxaafadeed kasoo baxay ururka, wadaxaajoodka waa in ay noqdaan kuwa miradhal ah isla markaana is-faham buuxa looga gaaro khilaafka ragaadiyey coddeynta heer federaal.
Bayaanka ayaa lagu caddeeyay in ay doonayaan in Soomaaliya ay mar-xaladan kala guurka ee xasaasiga ah ay uga baxdo qaab nabdoon ayna ku imaan karto wadahadal dhexmara hogaanka.
"Hogaamiyeyaasha Soomaalida waa in ay sidda ugu dhaqsiyaha badan uguna macquulsan u kulmaan si ay waddanka uga gudbiyaan isgoyskan qaan nabdoon," ayaa lagu yiri warka qoraalka.
Jaamacadda Carabta ayaa ku biireysa dalal iyo ururo caalami ah kuwaas oo walaac ka muujiyey mar-xalada ay haatan ku jirto Soomaaliya kana digay qabsoomida doorashooyin hal dhinac ah.
Golaha Ammaanka Qaramada Midoobay ayaa todobaadkii hore shaaca ka dhigay in madaxda Soomaalida muhiim ay in danta dadka iyo dalkaba ay uga tanaasulaan danahooda shaqsiga ah.
Qaylo-dhaanta daneeyeyaasha caalamiga ah ayaa kusoo hagaagtay ka gedaal markii muddo xileedka madaxweyne Farmaajo uu dhamaadey 8-dii Febraayo iyaddoo aan laga heshiin coddeynta xigta.
GAROWE ONLINE
