Kenya oo walaac ka muujisay bixitaanka Ciidamada Midowga Afrika ee jooga Soomaaliya

NAIROBI – Taliyaha Guud ee Ciidamada Difaaca Kenya (KDF), Jeneraal Charles Kahariri, ayaa sheegay in go’aanka lagu dhimay ciidamada Midowga Afrika ee ku sugan gudaha Soomaaliya uu horseeday dhibaato amni oo halis ah, taasoo ka dhalatay hoos u dhaca tirada ciidamada AUSSOM.

Jeneraal Kahariri ayaa hadalkan jeediyay intii uu socday kulan uu la yeeshay taliyihii hore ee AFRICOM ee Mareykanka, Gen. Michael Langley. Wuxuu sheegay in dib u gurashada ciidamada ay keentay farqi amni oo ay si sahlan u buuxinayaan kooxaha xagjirka ah, gaar ahaan Al-Shabaab, kuwaasoo kordhiyay weerarradooda tan iyo markii dhimista ay dhaqan gashay.

Kahariri wuxuu xusay in dowlado ka mid ah kuwa ciidamo geeyay Soomaaliya, Kenya ay ku jirto, ay hadda la galeen dowladda Soomaaliya heshiisyo gaar ah si kumeelgaar ah loo xaliyo abuurka amni ee taagan. Si kastaba, wuxuu carabka ku adkeeyay in xal waara laga gaari karo oo keliya marka ay beesha caalamku si buuxda dib ugu taageerto nabadeynta iyo dib u dhiska Soomaaliya.

Dhanka kale, Gen. Langley ayaa amaanay doorka ciidamada Kenya ee hawlgallada nabad ilaalinta, isagoo sheegay in KDF ay si weyn uga qeyb qaadatay dejinta gobolka.

Isagoo xilka u wareejinaya Gen. Anderson, wuxuu sheegay in AFRICOM ay sii wadi doonto taageerada ay siiso Soomaaliya si looga hortago khataraha argagixisada ee sii kordhaya.

GAROWE ONLINE