Kulan Ciyaareed xiiso leh oo Galabta dhaxmari doona Xulalka Galmudug & Hirshabeelle

Taageereyaasha ka qeyb galaya ciyaartan ayaa la filayaa inay soo buux dhaafiyaan garoonka.

Muqdisho, Soomaaliya - Tartanka Kubadda Cagta ee Dowlad-Goboleedyada dalka iyo gobolka Banaadir ayaa maanta lagu soo gabagabeyn doonaa Tuulada Ciyaaraha ee Stadium Muqdisho, iyadoo finalka ay isugu imaanayaan xulalka Galmudug iyo Hirshabeelle.

Taageerayaasha labada Xul ayaa tan iyo waaberigii soo xaadiray garoonka, iyadoo seeriga ciyaarta lagu wado in lagu dhawaaqo saddexda galabnimo.

Labada kooxood ayaa si wanaagsan ugu diyaar garoobay ciyaarta, iyadoo ciyaartoyda labada xul ay taageero weyn ka heleen madaxda maamulada ay matalaan.

Waa markii labaad oo xulka Galmudug si xiriir ah u gaaraan finalka tartankan, halka xulka Hirshabeelle ay markii ugu horeysay tahay soo gaaraan heerkaan.

Dhinaca kale taageereyaasha ka qeyb galaya ciyaartan ayaa la filayaa inay soo buux dhaafiyaan garoonka, iyadoo laamaha ammaanka ay soo saareen fariimo ay ku dalbanayaan in ammaanka la ilaaliyo.

GAROWE ONLINE