Luga-dheere: " Al-shabab waan ka xoreynaynaa Jubbooyinka"
-
- Posted On 24-03-2015, 04:01PM
March 24, 2015 (GO)- Madaxweyne ku-xigeenka labaad ee Jubaland Cabdiqaadir Xaaji Maxamuud (Luga-dheere) ayaa sheegay in dhowaan ciidamada Jubaland oo kaashanay kuwa AMISOM bilaabi doonaan wejiga labaad e hawgalka ka dhanka ah Al-shabaab ee loogu magac daray Gol iyo Gabiib.
Luga-dheere oo la hadlay idaacadda ku hadasha afka Jubaland ee Radio Kismaayo, wuxuu sheegay in wejigii koowaad ee hawlgalkan ciidamada Jubaland kula wareegeen deegaano ay kamid yihiin: Afar-mirood, Goobweyn, Lug-loow iyo Yoontooy.
"ciidamada AMISOM iyo kuwa Jubbaland oo iskaashanaya ayaa howlgalka si wadajir ah u fulin doona...wuxuu noqon doonaa kii ugu dambeeyey ee Al-shabaab looga sifeynayo gobollada Jubbooyinka iyo Gedo"ayuu yiri.
Saddex maalmood kahor ayey ahayd markii ciidamada Jubaland oo garabsanaya kuwa Kenya ee qaybta ka ah AMISOM ay si nabad ah kula wareegeen jaziiradda Kudhaa.
Magaalada Kismaayo waxaa weli ka soconaya shirka soo xulista xildhibaannada barlamanka Jubaland kaasoo galay wejigiisii ugu dambeeyey. Dhowaan ayaa la filayaa in la dhaariyo xubnaha barlamanka islamarkaana ay hoggaan doortaan.
GAROWE ONLINE
